Գալուստ Սահակյանը Մինսկի խմբի համանախագահներին կոչ արեց առավել հասցեական ներգործություն ունենալ Ադրբեջանի վրա

Ազգային ժողովը մեկ րոպե լռությամբ հարգեց նոյեմբերի 12-ին ուսումնական թռիչքի ընթացքում ադրբեջանական զինուժի կողմից խոցված ՄԻ-24 ուղղաթիռի զոհված անձնակազմի հիշատակը:

«Արմենպրես»-ի հաղորդմամբ՝ ՀՀ ԱԺ նախագահ Գալուստ Սահակյանը հանդես եկավ ադրբեջանական զինուժի կողմից ԼՂՀ ՊԲ ուղղաթիռի խոցման դեպքը դատապարտող հայտարարությամբ.

«Ադրբեջանական զորքերի կողմից խոցվել է Լեռնային Ղարաբաղի Հանրապետության պաշտպանության բանակի ՄԻ-24 ուղղաթիռը: Սա պաշտոնական Բաքվի հերթական սադրիչ գործողությունն է՝ ուղղված տարածաշրջանի փխրուն խաղաղությանն ու անվտանգությանը: Այս տարվա օգոստոսին տեղի ունեցած բացահայտ սադրիչ և ավանտյուրիստական գործողություններից հետո ԵԱՀԿ Մինսկի խմբի գործադրած միջնորդական ջանքերը և հորդորները փաստորեն հերթական անգամ ընդգծված ցինիզմով անտեսվում են ադրբեջանական իշխանությունների կողմից: Սա բանակցային խաղաղ գործընթացը տապալելու ևս մեկ քայլ է, որով ոտնահարվում է խաղաղ կարգավորման, վստահության ամրապնդման և հրադադարի ռեժիմի պահպանման շուրջ պայմանավորվածությունները: Իրավիճակի սրման և ապակայունացման փորձերի ողջ պատասխանատվությունը կրում են Բաքվի իշխանությունները: Ուստի ԵԱՀԿ Մինսկի խմբի համանախագահներին հերթական անգամ կոչ եմ անում դատապարտել և առավել հստակ հասցեական ներգործություն ունենալ Ադրբեջանի վրա խաղաղ կարգավորման գործընթացի ձախողման փորձերը կանխելու նպատակով…»,- մասնավորապես ասաց Գալուստ Սահակյանը: