JPMorgan-ը հնարավոր է համարել նավթի գների անկումը մինչև 65 դոլար

JPMorgan-ն զգալիորեն նվազեցրել է նավթի գների կանխատեսումը և կարծում է, որ հաջորդ տարվա հունվարի սկզբին նավթի գնանշումները միանգամայն կարող են իջնել բարելի դիմաց մինչև 70 դոլար և նույնիսկ հասնել 65 դոլարի մակարդակին, եթե ՕՊԷՔ-ի՝ նոյեմբերի նիստում որոշում չընդունվի նավթահանույթի բաժնեմասերի կրճատման վերաբերյալ: Այդ մասին, ինչպես տեղեկացնում է «Արմենպրես»-ը, հաղորդվում է բանկի հրապարակած կանխատեսման մեջ:

«Նավթի շուկայում պահանջարկի նկատմամբ առաջարկի գերազանցումը համաշխարհային տնտեսության ավելի ցածր, քան սպասվում էր, աճի պայմաններում մեծացնում է ՕՊԷՔ-ի կազմի մեջ մտնող երկրների կողմից բաժնեմասերի կրճատման անհրաժեշտությունը: Եթե ՕՊԷՔ-ը նոյեմբերին բաժնեմասերի նվազեցման որոշում չկայացնի, նավթի գները 2015 թվականի հունվարի սկզբին կարող են իջնել բարելի դիմաց մինչև 70 դոլար և նույնիսկ հասնել 65 դոլարի նշագծին»,- ասված է կանխատեսման մեջ:

Նավթի գների երկարաժամկետ կանխատեսումը մնացել է նույնը՝ բարելի դիմաց 90 դոլար:

Այս շաբաթ նավթի գները մոտեցել են կարևոր սահմանագծի՝ բարելի դիմաց 80 դոլարի, հաղորդել է «Ինտերֆաքս»-ը: