ԱՄՆ-ն լիահույս է Հայաստանի և Ադրբեջանի նախագահների միջև երկխոսության շարունակության հարցում

Միացյալ Նահանգները լիահույս են այն հարցում, որ ադրբեջանական կողմից հայկական ուղղաթիռի կործանումը չի խափանի Հայաստանի և Ադրբեջանի նախագահների հանձնառությունը երկխոսության շարունակության հարցում: Ինչպես հաղորդում է «Արմենպրես»-ը, այս մասին «Թվիթեր»-ի միկրոբլոգում գրառում է կատարել ԵԱՀԿ-ում ԱՄՆ առաքելությունը:

«Չնայած երեկվա իրադարձություններին, դեռևս լիահույս ենք, որ նախագահները կշարունակեն իրենց հանձնառությունը երկխոսության, հետագա հակամարտություններից խուսափելու և հրադադարի ռեժիմը հարգելու հարցում»,- նշվում է գրառման մեջ:

Ղարաբաղաադրբեջանական սահմանի արևելյան հատվածի օդային տարածքում նոյեմբերի 12-ին' ժամը 13.45-ի սահմաններում, ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ ՄԻ-24 ուղղաթիռը: Խոցման վայրը շփման գծին չափազանց մոտ է: Հակառակորդը շարունակում է տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ: Ավելի ուշ Ստեփանակերտից հաստատեցին, որ նախնական տվյալներով կա երեք զոհ: Անձնակազմի հրամանատարն է եղել մայոր Սերգեյ Սահակյանը: «Արմենպրես»-ի հետ զրույցում ԼՂՀ նախագահի մամուլի խոսնակ Դավիթ Բաբայանը շեշտել է, որ հայկական ուղղաթիռը ռազմական գործողությունների համար չի եղել, ուղղաթիռում չի եղել զինամթերք և ադրբեջանական օդուժն այն խոցել է թիկունքից:

Ավելի վաղ համատեղ հայտարարություն էին տարածել ու կատարվածը դատապարտել նաև ԵԱՀԿ Մինսկի խմբի երեք համանախագահները: Իսկ Ջեյմս Ուորլիքն այսօր կոչ է արել ԼՂ հակամարտության կողմերին բացառել պատերազմը: Լեռնային Ղարաբաղի հակամարտության գոտում լայնածավալ հակամարտությունը որևէ մե կի շահերից չի բխում: