Bambi մեդիամրցանակը շնորհվել է U2 խմբին, Միխայել Շումախերին և Ումա Թուրմանին

Գերմանական Bambi մեդիամրցանակի դափնեկիրներից մեկը 2014 թվականին դարձել է ավտոմրցարշավորդ Միխայել Շումախերը, որն այժմ ապաքինվում է գանգուղեղային ծանրագույն վնասվածքի հետևանքներից, տեղեկացնում է «Արմենպրես»-ը:

Պարգևը նոյեմբերի 13-ի երեկոյան կայացած մրցանակաբաշխության արարողությանն ընդունել է մարզիկի մենեջերը՝ Զաբինե Կեմը, իսկ այն հանձնել է «Ֆորմուլա-1»-ի չեմպիոն և Շումախերի հայրենակից Սեբաստիան Ֆետելը, ով հիշեցրել է, որ քսան տարի առաջ նույն օրը Շումախերն առաջին անգամ հաղթող է դարձել աշխարհի առաջնությունում:

Մրցանակի մյուս անվանի դափնեկիրների թվում են դերասանուհի Ումա Թուրմանը («լավագույն արտասահմանյան դերասանուհի») և U2 խումբը՝ Music International անվանակարգում: Նաև ոսկեզօծ արձանիկներ են շներհվել ֆուտբոլիստներ Միրոսլավ Կլոզեին և Ֆիլիպ Լամին, Գերմանիայում շլյագերների հայտնի կատարող Հելեն Ֆիշերին, ավտոմրցարշավորդ Նիկո Ռոզբերգին:

Մրցանակն ամեն տարի շնորհում է Գերմանիայի խոշորագույն մեդիակոնցեռններից մեկը՝ Hubert Burda Media-ն: Այն հանձնվում է «ինքնատիպ հայացքի ու երևակայության տեր մարդկանց, որոնց ակնառու հաջողություններն ու վաստակն անցած տարվա ընթացքում արտացոլվել են ԶԼՄ-ներում»: Ժյուրիի կազմում ավանդաբար ընդգրկվում են Hubert Burda Media կոնցեռնի խմբագրության ղեկավարները և հանրային գործունեության տարբեր ոլորտների փորձագետներ:

Ժյուրիի կողմից հանձնվում է ութ դյույմ բարձրությամբ և 5,5 ֆունտ քաշով բրոնզե եղնիկի ոսկեզօծ արձանիկ: Տարբեր տարիների մրցանակի դափնեկիրներ են դարձել համաշխարհային բռնցքամարտի լեգենդ Մոհամեդ Ալին, մոդելյոր Ջորջիո Արմանին, ուկրաինացի բռնցքամարտիկներ Վլադիմիր և Վիտալի Կլիչկոները, դերասանուհի և կենդանիների պաշտպան Բրիջիտ Բարդոն, «Օսկարի» մրցանակակիր Սանդրա Բալոքը, օպերային երգչուհի Խոսե Կարերասը, երգչուհի Շերը, ԱՄՆ-ի նախկին նախագահ Բիլ Քլինթոնը, Ջեյմս Բոնդի դերակատար Շոն Քոներին, դերասաններ Թոնի Կերտիսը և Ալեն Դելոնը: Դերասանուհի Սոֆի Լորենի հավաքածուում կա ինը եղնիկ, հաղորդել է ՌԻԱ «Նովոստին»: