Ադրբեջանը կոպտագույն կերպով խախտել է իրավական և մարդասիրական մի շարք դրույթներ. Վիգեն Քոչարյան

Հայկական ուղղաթիռի խոցմամբ Ադրբեջանը մի շարք միջազգային պարտավորություններ և օրենքներ է խախտել թե՛ իրավական, թե՛ մարդասիրական առումով: Հայաստանը պետք է միջազգային կառույցների հետ հետաքննություն սկսի ու միջազգային հանրությանը ներկայացնի, թե այս տարիների ընթացքում զինադադարի խախտումների և մարդկային զոհերի համար ով է մեղավոր: Տեսակետը ԵՊՀ Եվրոպական և միջազգային իրավունքի ամբիոնի վարիչ, միջազգային իրավունքի մասնագետ Վիգեն Քոչարյանինն է: Վերջինս միջագային կառույցների հայտարարություններից առանձնացնում է հատկապես Եվրամիության հայտարարությունը, որը Ադրբեջանի գործողությունները դատապարտելով պահանջում էր նաև հետաքննություն սկսել և պարզել միջադեպի մանրամասները: «Հետաքննության մասնակից պետք է դառնա նաև ԵԱՀԿ-ն, որը հակամարտության կարգավորման միջնորդ է և փաստերը ուսումնասիրելուց իրավական պատասխանատվության խնդիրները կհստակեցվեն, քանի որ տեղի ունեցածը միջազգային պարտավորությունների կոպտագույն խախտում է: Հակամարտության կողմերը ներգրավված են խաղաղ բանակցության մեջ, առկա է զինադադարի ռեժիմ և անզեն ուղղաթիռ խոցելով Ադրբեջանը խախտել է այն պարտավորությունները, որ ստանձնել է այդ երկիրը զինադադարի կնքման ժամանակ' այն է ուժի և ուժի սպառնալիքի չկիրառումը և հրադադարի պահպանումը»,- «Արմենպրես»-ի հարցին ի պատասխան նշում է Քոչարյանը' հավելելով, որ ի տարբերություն նախորդ հազարավոր դեպքերի, այս անգամ Հայաստանն ունի նաև ապացույց տեսաերիզ, որը փաստում է, որ ադրբեջանական գործողությունը պայմանավորված չի եղել հայկական կողմի սադրանքով: Հանգամանքը, որ ադրբեջանական զինծառայողն ուղղաթիռի խոցումից հետո պարգևատրվել է նույնպես մտահոգիչ է, քանի որ սովորաբար զինծառայողներին պարգևատրում են համապատասխան հրամանների հաջող կատարման համար:

«Փաստորեն ուղղաթիռի խոցման առնչությամբ կա երկու վարկած: Կամ գործողությունը հստակ պլանավորված է և տեղի է ունեցել Բաքվի ռազմաքաղաքական ղեկավարության հրամանով կամ էլ ադրբեջանական զինծառայողներին հրաման է տրված բոլոր հնարավոր միջոցներով հարմար պահին կրակել և ոչնչացնել ԼՂ ՊԲ մարտիկներին և զինտեխնիկան: Այս առումով դժվար է ասել, թե սրանցից որ մեկն է ավելի վնաս Ադրբեջանի համար»,- ասաց Վիգեն Քոչարյանը: Բացի իրավական կողմից, Ադրբեջանը խախտել է միջազգային մարդասիրական համապատասխան նորմեր, քանի որ ուղղաթիռի խոցումից հետո Ադրբեջանի կողմից կրակահերթերը չեն դադարում, և հայկական կողմը չի կարողանում փրկարարական աշխատանքներ իրականացնել:

Անդրադառնալով ուղղաթիռի խոցմանը՝ միջազգային իրավունքի մասնագետը շեշտեց, որ միջազգային հանրության արձագանքը լղոզված էր և պատասխանատվությունը կոնկրետացված չէր: «Տպավորություն է ստեղծվում, որ հայտարարությունների նպատակը ոչ թե եղածը դատապարտելն է և ապագայում նման դեպքերը կանխելը, այլ ընդամենը կանխել Հայաստանի կամ ԼՂՀ-ի կողմից համապատասխան արձագանքը»,- ասաց Վիգեն Քոչարյանը:

Ղարաբաղա-ադրբեջանական սահմանի արևելյան հատվածի օդային տարածքում նոյեմբերի 12-ին ժամը 13.45-ի սահմաններում, ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ ՄԻ-24 ուղղաթիռը: Խոցման վայրը շփման գծին չափազանց մոտ է: Հակառակորդը շարունակում է տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ: Ավելի ուշ Ստեփանակերտից հաստատեցին, որ նախնական տվյալներով կա երեք զոհ: Անձնակազմի հրամանատարն է եղել մայոր Սերգեյ Սահակյանը: Մյուս երկու զինծառայողներն էին լեյտենանտ Ազատ Սահակյանը և ավագ լեյտենանտ Սարգիս Նազարյանը: