Աշխարհի ղեկավարները ժամանում են Ավստրալիա՝ մասնակցելու G20-ի գագաթնաժողովին

Աշխարհ 14 Նոյեմբեր, 2014 14:03

Աշխարհի ղեկավարներն Ավստրալիա են ժամանում՝ մասնակցելու «մեծ քսանյակի»՝ Բրիսբենում կայանալիք գագաթնաժողովին:

Երկօրյա գագաթնաժողովը, որին, ի թիվս մյուսների, կմասնակցեն ԱՄՆ-ի և Ռուսաստանի նախագահները, նվիրված է տնտեսական աճին: Սպասվում է, որ Բրիսբեն կժամանեն 13 պետությունների ղեկավարներ:

Ավստրալիայի վարչապետ Թոնի Էբոտի խոսքով՝ երկրների ղեկավարները կքննարկեն նոր աշխատատեղերի ստեղծման, հարկային մեքենայությունների բացահայտման և համաշխարհային էկոնոմիկայի ամրապնդման խնդիրները:

Ուշադրության կառնվի նաև ուկրաինական ճգնաժամի շուրջ ստեղծված լարվածությունը: Միևնույն ժամանակ ակտիվիստները պահանջում են, որ օրակարգում ընդգրկվեն կլիմայի փոփոխության հետ կապված հարցերը:

G20-ի նախաշեմին ավստրալացիները բողոքի ակցիա են անցկացրել կլիմայի փոփոխման բնագավառում պետությունների քաղաքականության դեմ: Ավելի քան 400 բողոքավորներ Ավստրալիայի Բոնդի լողափին իրենց գլուխներն ավազի մեջ են թաղել ի նշան այն բանի դեմ բողոքի, որ կառավարությունները չեն ցանկանում G20-ի գագաթնաժողովի օրակարգում ընդգրկել կլիմայի փոփոխման հիմնախնդիրը:

Բրիսբենի գագաթնաժողովին, բացի 19 անդամ երկրներից, որոնց ընդհանուր առմամբ բաժին է ընկնում համաշխարհային ՀՆԱ-ի ավելի քան 80 տոկոսը, հրավիրված են նաև Իսպանիան, Մավրիտանիան, Մյանման, Նոր Զելանդիան, Սենեգալը, Սինգապուրը և միջազգային հանգուցային կազմակերպությունների ներկայացուցիչները: Ըստ կազմակերպիչների տվյալների՝ Բրիսբենի գագաթնաժողովին պաշտոնական պատվիրակությունների կազմում կժամանի շուրջ 5,3 հազար մարդ, իսկ նրա աշխատանքը կլուսաբանի մոտավորապես 2,3 հազար լրագրող:

Բրիսբենը Ավստրալիայի՝ մեծությամբ երրորդ քաղաքն է (այնտեղ ապրում է շուրջ 2,2 մլն մարդ) և երկրի հյուսիս-արևելքում գտնվող Քվինսլենդի նահանգի մայրաքաղաքը:

«Քսանյակի» կազմի մեջ մտնում են Արգենտինան, Ավստրալիան, Բրազիլիան, Մեծ Բրիտանիան, Գերմանիան, ԵՄ-ն, Հնդկաստանը, Ինդոնեզիան, Իտալիան, Կանադան, Չինաստանը, Մեքսիկան, Ռուսաստանը, Սաուդյան Արաբիան, ԱՄՆ-ը, Թուրքիան, Ֆրանսիան, Հարավաֆրիկյան Հանրապետությունը, Հարավային Կորեան և Ճապոնիան: