Վրաստանի նախագահը կոչ է արել համախմբվել

Վրաստանի նախագահ Գեորգի Մարգվելաշվիլին այսօր ելույթ է ունեցել խորհրդարանում և դիմել պատգամավորներին։ Նա կոչ է արել բոլորին միավորվել տարածքային ամբողջականության վերականգման և պահպանման համար պայքարում: Այս մասին հայտնել է «Грузия Online»-ը:

«Մենք բոլորս պետք է համախմբվենք Վրաստանի տարածքային ամբողջականության վերականգնման և պահպանման համար պայքարում», - ասել է նա:

Նրա խոսքերով՝ այս խնդրի լուծման համար Վրաստանի նախագահի վարչակազմը կրկնապատկել է իր ջանքերը նաև միջազգային ասպարեզում:

«Ցանկանում եմ հայտնել ձեզ, որ բոլոր ձևաչափերի բանակցությունների շրջանակում մենք ստացել ենք ամուր աջակցություն, ինչն արտահայտվել է ինչպես Ճապոնիայի կառավարության հետ համատեղ ստորագրված հայտարարությունում, այնպես էլ միջազգային համաժողովների օրակարգում Վրաստանի թեմայի ակտիվացմամբ: Մենք պետք է համախմբվենք Աբխազիայի և Ցխինվալի շրջանների տարածքների անեքսիան կանխելու համար։ Այդ վտանգը չպետք է բաժանի վրաց հասարակությանը, այն պետք է միավորի մեզ, քանի որ Ռուսաստանի գործողություններին պատասխանը և միակ ելքը եվրաինտեգրումն է»,- ասել է Մարգվելաշվիլին։