«Ուկրաինայի իրադարձությունները Վրաստանում ՌԴ-ի գործողությունների շարունակությունն են». Մարգվելաշվիլի

Ուկրաինայի իրադարձությունները 2008 թվականի օգոստոսին Վրաստանում Ռուսաստանի գործողությունների շարունակությունն են: Այդ մասին Վրաստանի նախագահ Գեորգի Մարգվելաշվիլին հայտարարել է հարևանության եվրոպական քաղաքականության և ընդլայնման հարցերով եվրակոմիսար Յոհաննես Հանի հետ հունվարի 16-ին Թբիլիսիում կայացա ծ հանդիպմանը, տեղեկացնում է «Արմենպրես»-ը՝ հղում անելով պետության ղեկավարի մամուլի ծառայությանը:

Կողմերը քննարկել են Վրաստանի և Եվրամիության հարաբերությունները, արծարծվել է ԵՄ-ի հետ Վրաստանի ասոցացման համաձայնագրի իրագործման կարևորությունը, խոսվել է նաև «Արևելյան գործընկերության» Ռիգայի գագաթնաժողովից Վրաստանի սպասումների մասին: Ինչպես նշում է «Նովոստի Գրուզիա»-ն, վրացական կողմը հուսով է, որ գագաթնաժողովում որոշում կընդունվի Եվրամիության հետ Վրաստանի անայցագիր ռեժիմի մասին:

«Հանդիպմանը կողմերը քննարկել են տարածաշրջանի իրադրությունը, մասնավորապես, Աբխազիայի և Ռուսաստանի միջև ձևակերպված «Դաշնակցության և ինտեգրացման մասին» պայմանագիրը: Գեորգի Մարգվելաշվիլին Յոհաննես Հանի հետ հանդիպմանը նաև նշել է, որ Ուկրաինայում տեղի ունեցած իրադարձությունները որոշակիորեն այն գործողությունների շարունակությունն են, որոնք 2008 թվականի օգոստոսին կատարվել են Վրաստանում»,-ասված է գերատեսչության հաղորդագրության մեջ: