114 տարեկանում վախճանվել է Մեծ Բրիտանիայի ամենածեր բնակիչը՝ Էթել Լանգը

114 տարեկան հասակում վախճանվել է Մեծ Բրիտանիայի ամենածեր բնակիչը՝ Էթել Լանգը: Այդ մասին, ինչպես տեղեկացնում է «Արմենպրես»-ը, հաղորդել է լոնդոնյան Daily Telegraph թերթի կայքը:

Էթել Լանգը, որը ծնվել է 1900 թվականին հանքագործի ընտանիքում, իր կյանքի օրոք տեսել է Մեծ Բրիտանիայի վեց միապետի և 22 վարչապետի: Նա երկրի ամենագլխավոր երկարակյացն է դարձել 2013 թվականին 113 տարեկան հասակում Լոնդոնի բնակչուհի Գրեյս Ջոնսի մահվանից հետո:

Վերջին տարիներին միսիս Լանգը, որը ողջ կյանքն անցկացրել է հայրենի Բառնսլի քաղաքում և 13 տարեկանից, թողնելով դպրոցը, աշխատել է տեղի վերնաշապիկներ արտադրող գործարանում, ապրել է ծերանոցում: Նշվում է, որ նա հրապուրված է եղել պարերով, որոնցով նա «զբաղվել է մինչև 107 տարեկանը»:

Դեռ հեռավոր 1922 թվականին Էթելն ամուսնացել է մունիցիպալ խորհրդի ղեկավարի որդու՝ սանտեխնիկ Ուիլյամ Լանգի հետ: Մեկ տարի հետո զույգն աղջիկ է ունեցել: Մարգարետն այժմ 89 տարեկան է: Էթել Լանգն այրիացել է 1988 թվականին: Մինչև 105 տարեկանը նա ապրել է միայնակ, իսկ հետո տեղափոխվել է ծերանոց:

ՏԱՍՍ-ը նշում է, որ երկարակյաց կինը երբեք չի ծխել և հազվադեպ է ոգելից խմիչք օգտագործել: Միևնույն ժամանակ նա հիանալի խոհարար է եղել, թխել է սեփական հացը և միշտ նախապատվությունը տվել է առողջ սննդին: Բացի այդ, «18-րդ դարից ի վեր» երկարակյացներ են եղել նրա նախնիները: