Ամերիկացիները կարող են իսլամիստներին հանել Ալիևի դեմ

Ադրբեջանում մարդու իրավունքների կոպիտ ոտնահարման հետ կապված՝ Ադրբեջանի դեմ ԱՄՆ-ի կողմից հնչող կոչերի և հնարավոր պատժամիջոցներ կիրառվելու առնչությամբ ռուսաստանյան մամուլում կարծիքներ են շրջանառվում, որ ամերիկացիները կարող են իսլամի սունի ծայրահեղական վահաբիներին հանել Իլհամ Ալիևի դեմ:

Ինչպես հաղորդում է «Արմենպրես»-ը, նման կարծիք է հայտնել ռուս քաղաքագետ և արևելագետ Եվգենի Բախրևսկին՝ lenta.ru լրատվական կայքում հրապարակած հոդվածում:

Վերլուծելով ԱՄՆ-ի և Ադրբեջանի կոռումպացված կառավարության միջև դիմակայության աղբյուրները, հատկապես, The New York Times թերթում հունվարի 12-ին հրապարակված՝ «Ադրբեջանից պարոն Ալիևի երկու երեսը», որում Ադրբեջանի ավտորիտար նախագահին անվանել են «քաղաքական Ջեքիլ և Հայդ», Բախրևսկին համոզմունք է հայտնել, որ չնայած վերջին տարիներին վահաբիները բավական ուժեղացել են Ադրբեջանում, սակայն, նրանք չեն կարող վիճակ փոխել այդ երկրում, քանի որ այնտեղ Իրանի ազդեցության տակ գտնվող լավ կազմակերպված շիա մեծամասնություն կա, և վահաբիները կարող են Ալիևի դեմ միայն որպես «խոյարահող ջոկատ» օգտագործվել:

«Կասկած չկա, որ Ադրբեջանի վրա ԱՄՆ-ի ճնշումները կշարունակվեն: Սակայն, Ադրբեջանում անհեռանկարային է բացառապես արևմտամետ ուժերի վրա հենվելը, քանի որ այդ ուժերը խիստ նվազ են և ունակ չեն ակտիվորեն դիմակայել Ալիևի վարչակարգին: Ի տարբերություն Ուկրաինայում փորձարկված՝ ազատականների և ազգայնականների միությանը, ամենայն հավանականությամբ, Ադրբեջանում ամերիկացիների կողմից կարող է օգտագործվել ազատականների և վահաբիների դաշինքը: Վերջին տարիներին սրընթացորեն ուժեղացող վահաբիներն, այդուհանդերձ, իրավիճակն Ադրբեջանում ինքնուրույն փոխելու հնարավորություն չունեն, քանի որ նրանց դիմակայում է հզոր և բավականաչափ կազմակերպված ու զգալի աստիճանով Իրանի ազդեցության տակ գտնվող շիա մեծամասնությունը: Սակայն, Ալիևի վրա կարող են ազդել. որպեսզի նա ավելի հնազանդ ու լսող դառնա, վահաբիները կարող են օգտագործվել որպես «խոյահարող ջոկատ» (տարան), -նշել է ռուս քաղաքական վերլուծաբանը: