Իրանի և «վեցյակի» բանակցությունների հաջորդ փուլը տեղի կունենա Դավոսում և Մյունխենում

Իրանական միջուկային ծրագրի շուրջ Իրանի և «վեցյակի» բանակցությունների հաջորդ փուլը տեղի կունենա Դավոսում (Շվեյցարիա) և Մյունխենում (Գերմանիա): Այդ մասին, ինչպես տեղեկացնում է «Արմենպրես»-ը, Թեհրանում հայտարարել է Իսլամական Հանրապետության արտաքին գործերի նախարար Ջավադ Զարիֆը:

Նախարարը նաև հայտնել է, որ անցած շաբաթ Ժնևում և Փարիզում ԱՄՆ-ի պետքարտուղար Ջոն Քերիի հետ կայացած իր բանակցությունները եղել են անկեղծ ու շիտակ: Նրանք քննարկել են ապագա «միջուկային գործարքի» մանրամասները և կենտրոնացել առավել խնդրահարույց հարցերի վրա:

«Ինչպես սովորաբար լինում է միջազգային բանակցություններում, մանրամասները դրանց ամենաբարդ մասն են»,- Զարիֆի խոսքը մեջբերում է ԻՌՆԱ գործակալությունը:

Խոսելով այն մասին, որ բանավեճերի ընդհանուր պատկերն արդեն որոշված է, նախարարն ընդգծել է Իրանի դիրքորոշման հիմնական կետերը՝ ինքնուրույն ուրան հարստացնելու, իր խաղաղ միջուկային ծրագիրը զարգացնելու Իրանի իրավունքը, ինչպես նաև Իսլամական Հանրապետության դեմ սահմանված պատժամիջոցները չեղարկելու անհրաժեշտությունը վերջնական համաձայնագրի կնքումից անմիջապես հետո:

Զարիֆը ճշտել է, որ միջանկյալ համաձայնագրի գործողության ավարտին մնացած մի քանի ամսվա ընթացքում կողմերն ուշադրությունը կենտրոնացնելու են այդ մանրամասների վրա: Իսկ այնպիսի մանրամասներ, ինչպիսին է սեփական խաղաղ ատոմային էներգետիկան զարգացնելու համար Իրանին անհրաժեշտ ցենտրիֆուգների թվաքանակի համաձայնեցումը, «կարող են երկար ժամեր պահանջել փորձագետներից»:

ՏԱՍՍ-ի հաղորդմամբ՝ Զարիֆը նաև ընդգծել է, որ բանակցություններում Իրանի ընդդիմախոսները, «եթե նրանք ցանկանում են որևէ արդյունքի հասնել, պետք է հասկանան, որ անհրաժեշտ է դադարեցնել Իսլամական Հանրապետությանն ահաբեկելը»:

«Չի կարելի միաժամանակ բանակցություններ վարել Իրանի հետ և ճնշում գործադրել նրա վրա»,- ասել է ԱԳ նախարարը: Նա նաև հույս է հայտնել, որ բանակցությունների դրական արդյունքներ ձեռք կբերվեն սահմանված ժամկետում՝ մինչև 2015 թվականի հուլիսի 1-ը, թեև այժմ դա կարող է շատ դժվարին բան թվալ: