ԵՄ-ն վիճարկելու է ՀԱՄԱՍ-ի գործով դատարանի որոշումը

Եվրոպական Միությունը մտադիր է վիճարկել ՀԱՄԱՍ պաղեստինյան շարժման գործով ԵՄ-ի դատարանի` 2014 թվականի դեկտեմբերի 17-ի վճիռը ԵԽ-ի դեմ: Այս մասին հայտնել է «Российская газета»-ն` հղում անելով Եվրոպայի դիվանագիտության ղեկավար Ֆեդերիկա Մոգերինիի` հունվարի 19-ին տարածած հայտարարությանը:

«Դատարանի վճիռը չեղյալ է հայտարարել ՀԱՄԱՍ-ի նկատմամբ ԵՄ-ի խորհրդի ձեռնարկած միջոցները, ներառյալ այդ կազմակերպության ներառումը ահաբեկչական կազմակերպությունների ցուցակում և ՀԱՄԱՍ-ի ակտիվների սառեցումը»,- ասվում է հայտարարության մեջ:

Մոգերինիի հայտարարության մեջ նշվում է, որ դատարանի որոշումը հիմնված էր ընթացակարգային հիմքերի վրա և չի վերաբերվել ՀԱՄԱՍ-ը ահաբեկչական կազմակերպություն նշանակելու Դատարանի գնահատմանը: Այդ պատճառով Խորհուրդը որոշել է վիճարկել դատարանի որոշ եզրակացություններն ու պաշտոնական բողոքարկում է ներկայացրել:

Ավելի վաղ, ԵՄ-ի գլխավոր դատարանը բեկանել է ՀԱՄԱՍ-ը ահաբեկիչների ցուցակում թողնելու որոշումը` անհիմն մեղադրանքների պատճառով: Դատարանը եկել է այն եզրակացության, որ կազմակերպության դեմ ուղղված մեղադրանքները հիմնված են մամուլում շրջանառվող պնդումների վրա: Միևնույն ժամանակ, դատարանը որոշել է, որ կազմակերպության դեմ սահմանափակող միջոցները ուժի մեջ կմնան առաջիկա երեք ամիսների ընթացքում: