Ելիսեյան պալատի վրայով անհայտ ծագման անօդաչու թռչող ապարատ է անցել

Ելիսեյան պալատի շենքի՝ Ֆրանսիայի Հանրապետության ղեկավարի աշխատանքային նստավայրի վերևում գիշերն անօդաչու թռչող սարք է նկատվել երկնքում: Այս մասին հայտնել է ՏԱՍՍ-ը՝ հղում անելով նախագահական վարչակազմի մամուլի ծառայությանը:

Թռիչքը շարունակվել է ընդամենը մի քանի վայրկյան:

«Սարքն անմիջապես նկատվել է անվտանգության աշխատակիցների կողմից, ապա անմիջապես հեռացել»,- նշել են Ելիսեյան պալատում:

Անօդաչու թռչող սարքի ծագման մասին առայժմ ոչինչ չի հաղորդվում, ինչպես նաև հայտնի չէ, թե ով և ինչ նպատակով կարող էր այն արձակել:

Պատահածի փաստով սկսվել է հետաքննություն, որը հանձնարարվել է Փարիզի դատախազությանը:

Վերջին ամիսներին Ֆրանսիայում գրանցվել են մի ամբողջ շարք դեպքեր, երբ անհայտ անձինք անօդաչու թռչող ապարատներ են արձակել ատոմակայանների վրայով: