Չինաստանի բնակչությունը գերազանցել է 1 մլրդ 367 միլիոնի նշագիծը

Չինաստանի բնակչության թվաքանակը (առանց Հոնկոնգի և Մակաոյի հատուկ վարչական տարածաշրջանների, ինչպես նաև Տայվան կղզու), ըստ 2014 թվականի տվյալների, կազմել է 1 միլիարդ 367 միլիոն 820 հազար: Այդ մասին, ինչպես տեղեկացնում է «Արմենպրես»-ը, հաղորդվում է ՉԺՀ-ի պետական վիճակագրական վարչության զեկույցում:

Վիճակագրական տվյալների համաձայն՝ բնակչության բնական աճը 2014 թվականին կազմել է 7,1 միլիոն մարդ: Ընդհանուր առմամբ աճի տեմպերը տարեկան հաշվարկով արագացել են 0,29 տոկոսով:

Զբաղված բնակչության թվաքանակը 2014 թվականին աճել է 2,7 միլիոնով՝ կազմելով ավելի քան 772 միլիոն: Գերատեսչության տվյալներով՝ երկրում տղամարդկանց թիվը (700 մլն 790 հազար) 33,7 միլիոնով գերազանցում է կանանց թվաքանակը:

Քաղաքներում ապրում է բնակչության կեսից ավելին՝ երկրի ավելի քան 749 միլիոն քաղաքացիներ: Դրա հետ մեկտեղ վերջին տարվա ընթացքում գյուղական բնակչության թիվը կրճատվել է 10 միլիոնով՝ մինչև 618,6 միլիոն:

Ինչպես նշում է ՏԱՍՍ-ը, Չինաստանի բնակչությունը շարունակում է անշեղորեն ծերանալ: 60-ից բարձր տարիքի բնակիչների թվաքանակը ներկայում կազմում է 212,42 միլիոն. սա բնակչության ընդհանուր թվի 15,5 տոկոսն է: Առողջապահության գործերի և պլանային ծնելիության պետական կոմիտեի կանխատեսումների համաձայն՝ մինչև 2030 թվականը երկրի տարեց քաղաքացիների թիվը կհասնի 356 միլիոնի:

ՉԺՀ-ում ժողովրդագրական քաղաքականության սկզբունքներն սկսել են ձևավորվել դեռ անցյալ դարի 70-ական թվականներին, երբ պետությունը հայտնվեց գերբնակեցման սպառնալիքի առջև: Այն ժամանակ ընտանիքներին թույլատրվում էր միայն մեկ երեխա ունենալ:

Վերջերս ՉԺՀ-ի օրենսդիրներն ընդունել են որոշում, որով թույլատրվում է երկու երեխա ունենալ այն ընտանիքներին, որտեղ ամուսիններից մեկն իրենց ծնողների միակ զավակն է Չինաստանում: Քաղաքականության նման մեղմացումը պետք է հանգեցներ բնակչության սրընթաց աճի, սակայն դա տեղի չունեցավ: Երկրի ավելի ու ավելի շատ քաղաքային ընտանիքներ, ֆինանսական նկատառումներից ելնելով, նախընտրում են սահմանափակել ծնելիությունը և դաստիարակել մեկ երեխա: Նրանց միայն 60-65 տոկոսը կցանկանար երկրորդ երեխան ունենալ. գյուղերում նման զավակասերների բաժինը մինչև 90 տոկոս է:

ՉԺՀ-ի առողջապահության գործերի և պլանային ծնելիության պետական կոմիտեի վերջին տվյալների համաձայն՝ 11 մլն ընտանիքներից միայն 800 հազարն է որոշել երկրորդ երեխան ունենալ: Գրեթե նույնն են վկայում նաև այն հարցման արդյունքները, որն անցկացվել է Չինաստանի երիտասարդական հանդեսներից մեկի կողմից: Այն ցույց է տվել, որ ավելի քան 2 հազար հարցվածների 58 տոկոսը չի ծրագրում երկրորդ երեխան ունենալ:

«Ծնելիության սահմանափակման քաղաքականության հետագա մեղմացումը էականորեն չի փոխի ստեղծված իրադրությունը»,-կարծում է Չինաստանի հասարակական գիտությունների ակադեմիայի փոխնախագահ Ցայ Ֆանը: Դրա հետ մեկտեղ նա նշել է, որ «երկարաժամկետ հեռանկարում դա կնպաստի երկրի հավասարակշռված ժողովրդագրական կառուցվածքի հաստատմանը և աշխատունակ բնակչության թվաքանակի ավելացմանը»:

Փորձագետներից ոմանք արդեն խոսում են այն մասին, որ եթե քաղաքականությունը չբարեփոխվի, ապա մինչև 2050 թվականը բնակչության աճը կլինի 4 տոկոսից պակաս, ինչը զգալիորեն կանդրադառնա երկրի զարգացման տեմպերի վրա: