ՄԱԿ-ի ԱԽ-ն բաց նիստում կքննարկի Ուկրաինայի արևելքում սրված իրադրությունը

ՄԱԿ-ի Անվտանգության խորհուրդը կանցկացնի բաց նիստ, որի ընթացքում կքննարկի Ուկրաինայի արևելքում սրված իրադրությունը, տեղեկացնում է «Արմենպրես»-ը:

Հանդիպումը կդառնա 27-րդը երկրում ճգնաժամի սկսվելուց ի վեր և տեղի կունենա Բեռլինում «նորմանդական քառյակի» (Ռուսաստան, Ուկրաինա, Գերմանիա և Ֆրանսիա) արտաքին գործերի նախարարների նիստի ավարտից հետո:

ՄԱԿ-ի ԱԽ-ի նիստը, որը նշանակված է տեղական ժամանակով ժամը 15:00-ին (Երևանի ժամանակով՝ ժամը 24:00-ին), հրավիրվել է Լիտվայի պատվիրակության պահանջով, որը ԱԽ-ի ոչ մշտական անդամ է: Սկզբնապես ենթադրվում էր, որ քննարկումը կանցկացվի դռնփակ, բայց ԱՄՆ-ի պատվիրակության պնդմամբ որոշվել է անցկացնել բաց հանդիպում, որին կկարողանան մասնակցել ուկրաինացի դիվանագետները:

Ինչպես նշում է ՏԱՍՍ-ը, ՄԱԿ-ին առընթեր ՌԴ-ի մշտական ներկայացուցիչ Վիտալի Չուրկինը հայտարարել է, որ նիստի արդյունքում որևիցե որոշման կամ փաստաթղթի ընդունում չի սպասվում:

Վերջին անգամ ՄԱԿ-ի ԱԽ-ն Ուկրաինային նվիրված նիստ է անցկացրել ավելի քան երկու ամիս առաջ՝ նոյեմբերի 12-ին: Քննարկվել է մարդու իրավունքների գերագույն կոմիսարի վարչության հերթական զեկույցը:

ԵԱՀԿ-ն նախօրյակին Վիեննայում կայացած նիստում կոչ է արել անհապաղ դադարեցնել կրակը Ուկրաինայի արևելքում:

ԵԱՀԿ-ի բոլոր անդամների, ներառյալ Ուկրաինան և Ռուսաստանը, ներկայացուցիչների կողմից ընդունված հռչակագրում «լուրջ մտահոգություն» է հայտնված Ուկրաինայի արևելքում վերջին օրերին մարտական գործողությունների սաստկանալու կապակցությամբ:

Կազմակերպության գործող նախագահ, Սերբիայի ԱԳ նախարար Իվիցա Դաչիչը հայտարարել է, որ «հռչակագիրը հաստատում է ԵԱՀԿ-ի մասնակից 57 պետությունների հաստատ համոզմունքը, որ Ուկրաինայում բռնության և թշնամանքի նոր պոռթկումներին կարելի վերջ դնել ոչ թե մարտի դաշտում, այլ միայն բանակցությունների սեղանի շուրջ»:

ԱՄՆ-ի նախագահ Բարաք Օբաման Ֆրանսիայի իր պաշտոնակից Ֆրանսուա Օլանդի հետ կայացած հեռախոսազրույցի ընթացքում քննարկել է Ուկրաինայի արևելքի իրադրությունը: Ինչպես հաղորդել է Սպիտակ տունը, զրուցակիցները հայտարարել են Ռուսաստանի դեմ սահմանված պատժամիջոցները պահպանելու անհրաժեշտության մասին, եթե չկատարվեն Մինսկի համաձայնությունները:

Բացի այդ, նախագահները կարևորել են Ուկրաինայի կառավարությանը լրացուցիչ ֆինանսական աջակցության ապահովումը: