Վրաստանի շուրջ 100 քաղաքացի է կռվում ուկրաինացի ուժայինների կողմում

Վրաստանցի շուրջ 100 զինվորական է կռվում ուկրաինացի ուժայինների կողմում: Այդ մասին, ինչպես տեղեկացնում է «Արմենպրես»-ը, գեներալ Գիգի Կալանդաձեն հայտարարել է Կիևից ուղիղ հեռարձակման ընթացքում:

«Վրաստանի քաղաքացիների թվաքանակը շարունակ փոփոխվում է, բայց ընդհանուր հաշվով կռվում է մինչև վրացի 100 զինվորական»,- հունվարի 20-ի երեկոյան ասել է Կալանդաձեն «Ռուսթավի-2» հեռուստաընկերության եթերում:

Նա «վիրավորանք» է համարել հայտարարություններն այն մասին, թե վրացի մարտիկներին բարձր են վճարում ռազմական գործողություններին մասնակցելու համար: Կալանդաձեի խոսքով՝ վրացի զինվորականներն օգնություն են ստանում միայն իրենց ընկերներից ու ընտանիքներից:

Ավելի վաղ Վրաստանի արդարադատության նախարար Տեա Ցուլուկիանին հայտարարել է, որ երկրի քրեական օրենսգիրքը ներառում է նոր հոդված, որի համաձայն երկրի սահմաններից դուրս անօրինական զինված կազմավորումներին Վրաստանի քաղաքացիների մասնակցությունը համարվում է հանցագործություն:

Ավելի ուշ Վրաստանի ներքին գործերի փոխնախարար Լևան Իզորիան հայտնել է, որ այդ օրենքը չի վերաբերում երկրի այն քաղաքացիներին, որոնք Ուկրաինայում կռվում են պաշտոնական իշխանությունների կողմում, հաղորդել է ՌԻԱ Նովոստին: