Ամերիկացիներն Օբամային բնութագրել են «լավ» և «անձեռնհաս»

ԱՄՆ-ի քաղաքացիները սոցիոլոգիական հարցման ընթացքում երկրի նախագահ Բարաք Օբամային բնութագրել են մեկ բառով: Ինչպես ասված է Pew Research հետազոտական ընկերության զեկույցում, առավել հաճախ պետության ղեկավարին բնութագրել են «լավ» (35 հիշատակում), «անձեռնհաս» (33 հիշատակում) և «ինտելիգենտ» (21 հիշատակում), տեղեկացնում է «Արմենպրես»-ը:

Այս բնութագրումները պահպանել են իրենց դիրքերը 2013 թվականի համեմատությամբ: Սակայն տարածվածությամբ չորրորդ պատասխանին՝ «ստախոսին», այս անգամ փոխարինել է «դիկտատոր» բառը (12 հիշատակում): Նույնքան անգամ էլ Օբամային որակել են «ազնիվ» և «հիմար»: Քաղաքացիները նրան ամենաքիչը բնութագրել են որպես «նախագահ»:

Վերլուծաբանների խոսքով՝ հարցման արդյունքները վկայում են, որ Օբամայի վարկանիշը վերջին տարիներին վատացել է: Համեմատության համար նշվել է, որ 2009 թվականին պետության ղեկավարին բնութագրող բառերի առաջին հնգյակը հետևյալ տեսքն ուներ՝ «ինտելիգենտ», «լավ», «սոցիալիստ», «լիբերալ» և «հիանալի»:

Հարցմանը, որն անցկացվել է հունվարի 7-ից 11-ը, մասնակցել է ԱՄՆ-ի 1504 քաղաքացի:

Անցյալ տարվա նոյեմբերին ABC News հեռուստաալիքը Washington Post թերթի հետ համատեղ անցկացրել է հարցում, որը ցույց էր տվել, որ նախագահ Օբամայի վարկանիշն ընկել է ռեկորդային ցածր մակարդակ: Ուսումնասիրության արդյունքների համաձայն՝ ԱՄՆ-ի ղեկավարի գործունեությունը դրական է գնահատում Միացյալ Նահանգների բնակիչների միայն 44 տոկոսը: 2014 թվականի հունվարին այդ ցուցանիշը կազմում էր 49 տոկոս, իսկ նրա երկրորդ նախագահական ժամկետի սկզբին՝ 60 տոկոս: