Սումգայիթյան ջարդերի 27-րդ տարելիցին ընդառաջ Բրեդ Շերմանը հանդիպել է Հայ դատի Վաշինգտոնի հանձնախմբի անդամների հետ

Հասարակություն 13 Փետրվար, 2015 20:59

Միացյալ Նահանգների կոնգրեսի ներկայացուցիչների պալատի արտաքին գործերի կոմիտեի անդամ Բրեդ Շերմանին հուզել է Բաքվի ջարդերից փրկված հայ մարդու պատմությունը:

Ինչպես հաղորդում է «Արմենպրես»-ը, այս մասին գրառում է կատարել կոնգրեսականը: Նրա ֆեյսբուքյան էջից տեղեկանում ենք, որ ԱՄՆ օրենսդիրը հանդիպել է Հայ դատի Վաշինգտոնի հանձնախմբի անդամների հետ, որի ժամանակ, ամենայն հավանականությամբ, քննարկվել է 20-րդ դարի 80-ական թվականների վերջին և 90-ականների սկզբին Ադրբեջանում հայոց ջարդերի և դրա հետևանքով տեղահանված հայ փախստականների հարցը:

Հայկական կողմը կոնգրեսականին ծանոթացրել է 1990 թվականի հունվարի 13-19-ին Բաքվում Ադրբեջանի ժողովրդական ճակատի (ԱԺՃ) կազմակերպած և իշխանությունների կողմից հովանավորված հայերի ջարդերից փրկված հայի կյանքի պատմությունը, ով ներկայումս բնակվում է Լոս Անջելեսի Էնսինո թաղամասում:

Բրեդ Շերմանը մշտապես դատապարտել է Ադրբեջանի կողմից Սումգայիթում, Կիրովաբադում, Բաքվում և մյուս հայկական բնակավայրերում հայերի կոտորածներն ու հալածանքներըˋ նշելով, որ «ապագայում նման ողբերգությունների կրկնությունը կանխելու համար անհրաժեշտ է ճանաչել նախորդները»: Հիշեցնենք, որ այս տարվա փետրվարի 27-29-ը լրանալու է Սումգայիթի ջարդերի և քաղաքի հայ ազգաբնակչության զանգվածային տեղահանության 27-րդ տարելիցը: Հայ ազգի դեմ իրականացրած այս հանցագործության նպատակն էր կանխել Արցախյան շարժումը` հայերին ահաբեկելով նոր արյո ւնահեղ գործողությունների հեռանկարով՝ կանխել Արցախյան ազատագրական պայքարի տարածումը։