Իշխող Ռեֆորմիստական կուսակցությունը հաղթանակ է տարել Էստոնիայի խորհրդարանական ընտրություններում

Իշխող Ռեֆորմիստական կուսակցությունը հաղթանակ է տարել Էստոնիայի խորհրդարանական ընտրություններում՝ հավաքելով ձայների 27,7 տոկոսը, ինչը համապատասխանում է 30 մանդատի 101-տեղանոց խորհրդարանում: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել են երկրի Հանրապետական ընտրական հանձնաժողովում:

24,8 տոկոս ձայներով (27 մանդատ) երկրորդ տեղը գրավել է Կենտրոնամետ կուսակցությունը, երրորդ տեղում ներկայիս իշխող կոալիցիայի մեջ մտնող Սոցիալ-դեմոկրատական կուսակցությունն է՝ 15,2 տոկոս ձայներով (15 մանդատ), որին հաջորդում են «Հայրենիքի միություն և հանրապետություն» կուսակցությունը՝ 13,7 տոկոս (14), Ազատ կուսակցությունը՝ 8,7 տոկոս (8) և Պահպանողական ժողովրդական կուսակցությունը՝ 8,1 տոկոս (7):

Ընտրություններին մասնակցությունը կազմել է 63,7 տոկոս: Ընտրական հանձնաժողովի տվյալներով՝ խորհրդարանի 101 տեղին հավակնում էր 872 թեկնածու: Ընտրություններին մասնակցել են տասը կուսակցություններ և 11 անկախ թեկնածուներ:

Մարտի 1-ին կայացած ընտրություններում Տալլինի քաղաքագլուխ, ընդդիմադիր Կենտրոնամետ կուսակցության առաջնորդ Էդգար Սավիսաարը ռեկորդային թվով ձայներ է հավաքել: Ըստ նախնական տվյալների՝ նրա օգտին քվեարկել է 25,07 հազար ընտրողներ: Նախորդ ռեկորդը նույնպես պատկանում էր Սավիսաարին, երբ նա 2011 թվականի նախորդ մունիցիպալ ընտրություններում հավաքեց 23 հազար ձայն: