Նեմցովի սպանության վարկածներում շրջանառվում է նաև Ադրբեջանի պաշտպանության նախկին փոխնախարարի անունը

Ռուսաստանի ընդդիմության առաջնորդներից Բորիս Նեմցովի սպանության վերաբերյալ վարկածներում շրջանառվում է նաև Ադրբեջանի պաշտպանության նախկին փոխնախարար, ներկայումս որոնման մեջ գտնվող գնդապետ Իսա Սադըգովի անունը:

Ինչպես հաղորդում է «Արմենպրես»-ը, «Իզվեստիա»-ն հայտնել է, որ Նեմցովի մահվան դեպքն ուսումնասիրող հետաքննչական բրիգադը նրա մահվան մեջ չի բացառում ուկրաինական հետքը: Ենթադրվում է, որ Նեմցովի սպանությունն Ուկրաինայի հատուկ ծառայությունների պատվերով իրագործել է Ջոհար Դուդաևի անվան չեչենական գումարտակը:

Վարկածներից մեկով Նեմցովի սպանության կազմակերպիչն այդ գումարտակի ներկայիս հրամանատար, ՌԴ նախագահ Վլադիմիր Պուտինի դեմ մահափորձ պատրաստելու մեջ մեղադրվող Ադամ Օսմանևն ու նրա կինը' Ամինա Օկուևան են:

Մի այլ վարկածով էլ Նեմցովի սպանության մեջ կարող է դեր ունենալ նաև վրեժի գործոնը: 2014 թվականին ստեղծված Ջոհար Դուդաևի անվան գումարտակի հիմնադիր, Դոնբասում ուկրաինացի զինյալների կողմից կռվող ծագումով չեչեն Իսա Մունաևը փետրվարի 1-ի մարտերում սպանվել էր, և ենթադրվում է, որ չեչեն մարտիկներն Ուկրաինայի պատվերը կատարելուն զուգահեռ վրեժ են լուծել իրենց հրամանատարի մահվան համար:

Հետաքրքիր է, որ Մունաևի ստեղծած և ահաբեկիչչների կողմից ֆինանսավորվելու մեջ մեղադրվող «Ազատ Կովկաս» շարժման գումարտակի շտաբի պետը հենց Իսա Սադըգովն է: