Մոսկվան հրաժեշտ է տալիս Բորիս Նեմցովին

Մոսկվայի Սախարովյան կենտրոնում ընթանում է լույս փետրվարի 28-ի գիշերը Բոլշոյ Մոսկվորեցկի կամրջին սպանված ռուս ընդդիմադիր գործիչ Բորիս Նեմցովի հետ հրաժեշտի արարողությունը: Մարտի 3-ին ավելի ուշ քաղաքական գործչին հողին են հանձնելու Մոսկվայի Տրոեկուրովյան գերեզմանատանը, տեղեկացնում է «Արմենպրես»-ը:

Նեմցովին հրաժեշտ տալու են եկել նրա մերձավորները, ընկերներն ու զինակիցները: Ինչպես հաղորդում է ՌԻԱ Նովոստին, Նեմցովին հրաժեշտ տալու է եկել նաև ՌԴ փոխվարչապետ Արկադի Դվորկովիչը: Արարողությանը եկել է նաև Ռուսաստանի վարչապետի մամուլի քարտուղար Նատալյա Տիմակովան:

Սախարովյան կենտրոնի դահլիճում տեղադրված է բաց դագաղը: Վառվում են մոմեր, հնչում է սգո երաժշտություն, սրահում դրված են սգո ծաղկեպսակներ, այստեղ կախված են քաղաքական գործչի սև-սպիտակ լուսանկարները, մարդիկ ծաղիկներ են բերում:

Նեմցովը դարձել էր արդի Ռուսաստանի ամենավառ քաղաքական գործիչներից մեկը:

«Նրան վիճակվեց աշխատելու կարևոր պաշտոններում մեր երկրի համար դժվարին անցումային շրջանում: Նա միշտ շիտակ և ազնվորեն հայտարարում էր իր դիրքորոշումը, պաշտպանում իր տեսակետը»,- ընդգծել է ՌԴ-ի նախագահ Վլադիմիր Պուտինը Նեմցովի մորը հղած ցավակցական հեռագրում:

«Բորիս Նեմցովը դարձավ մեր երկրում ժողովրդավարական բարեփոխումների շրջանի ամենատաղանդավոր քաղաքական գործիչներից մեկը: Գործում էր բացահայտ, հետևողականորեն և երբեք չէր դավաճանում իր հայացքներին»,- նշել է վարչապետ Դմիտրի Մեդվեդևը:

Նեմցովի հուղարկավորությանը մասնակցելու մտադրության մասին հայտնել են շատ խորհրդարանականներ, համերկրային և տարածաշրջանային, այդ թվում՝ Յարոսլավլի մարզի իշխանության մարմինների, օրենսդիր ժողովի, որտեղ նա աշխատում էր, ներկայացուցիչներ, հասարակական գործիչներ, իրավապաշտպաններ, կուսակցությունների անդամներ՝ ինչպես Նեմցովի նախկին զինակիցներ, այնպես էլ ախոյաններ:

Սգո արարողությանը կմասնակցեն նաև այլ երկրների ներկայացուցիչներ: Այսպես, ինչպես սպասվում է, կժամանեն Լատվիայի արտգործնախարարության խորհրդարանական քարտուղար Զանդա Կալինյա Լուկաշևիցան, Ռիգայի քաղաքագլուխ Նիլ Ուշակովը: Նեմցովին հրաժեշտ տալու կգան Մոսկվայում Եվրամիության պատվիրակության ղեկավարը, դիվանագիտական կազմի ներկայացուցիչներ: