Հնդկաստանում խոզագրիպը տարեսկզբից 1158 մարդու կյանք է խլել, երկրում խուճապ է սկսվում

Հնդկաստանում խոզագրիպը տարեսկզբից 1150 մարդու կյանք է խլել: Այդ մասին, ինչպես տեղեկացնում է «Արմենպրես»-ը, մարտի 4-ին ՏԱՍՍ-ին հայտնել են երկրի առաողջապահության և ընտանիքի բարեկեցության նախարարությունում:

Գերատեսչության տվյալներով՝ «տարբեր նահանգների ևս ավելի քան 22 հազար բնակիչներ վարակվել են H1N1 վիրուսով»: Ամեն օր վիրուսը մոտավորապես 50 հնդիկների մահվան պատճառ է դառնում: Մարտի 2-ի տվյալների համաձայն՝ մահվան դեպքեր են գրանցվել երկրի 28 նահանգներից 24-ում: Իրադրությունն առավել տագնապալի է Հուջարաթ և Ռաջասթան արևմտյան նահանգներում և Հնդկաստանի հյուսիս-արևմուտքում, որտեղ տարեսկզբից մահացել է համապատասխանաբար 283 և 277 մարդ:

Փետրվարի 24-ից Ահմադաբադի՝ Հուջարաթի նահանգի ամենամեծ քաղաքի իշխանություններն արգելել են բոլոր զանգվածային հավաքները, բացառությամբ հարսանիքների և թաղումների, որպեսզի կանխեն խոզագրիպի տարածումը: Սակայն այս միջոցառումները չեն ազդել վիճակագրության վրա, ինչն իսկական խուճապ է առաջացրել քաղաքում: Այդ կապակցությամբ Ահմադաբադի Փաստաբանների ընկերակցությունը հայտարարել է, որ ավելի քան 10 հազար իրավաբան առաջիկա շաբաթվա ընթացքում չի մասնակցի դատական նիստերին, որպեսզի խուսափի վարակվելու սպառնալիքից: