Տավուշցիներն Արմեն Երիցյանին են ներկայացրել իրենց համայնքների խնդիրները

Համայնքների խոշորացման պիլոտային ծրագրի գործարկման շրջանակներում ՏԿԱԻ նախարար Արմեն Երիցյանը երկօրյա աշխատանքային այցով Տավուշի մարզում է: Ինչպես տեղեկացնում են ՀՀ տարածքային կառավարման և արտակարգ իրավիճակների նախարարությունից, ապրիլի 8-ին Արմեն Երիցյանը Տավուշի փոխմարզպետ Լևոն Սարգսյանի ուղեկցությամբ այցելել է մարզի՝ համայնքների խոշորացման պիլոտային ծրագրի Դիլիջանի փնջի համայնքներ: Ծրագրի համաձայն, համայնքների խոշորացման պիլոտային ծրագրում ընդգրկված Դիլիջան, Հաղարծին, Թեղուտ, Գոշ, Աղավնավանք, Խաչարձան և Հովք համայնքները կմիավորվեն, խոշորացված համայնքի կենտրոնը կլինի Դիլիջանը:

Հանդիպելով փնջում ընդգրկված համայնքների բնակիչների հետ՝ նախարար Երիցյանը բնակչությանը մանրամասն բացատրել է խոշորացման ծրագրի էությունը, մատնանշել ծրագրի իրականացման հաջողված փորձը այնպիսի պետություններում, ինչպիսիք են Գերմանիան, Ֆրանսիան և Արևելյան Եվրոպայի մի շարք երկրներ: «Այս ծրագիրը ոչ միայն հնարավորություն կտա համայնքներին համաչափ զարգանալ, այլև' թույլ կտա էլ ավելի շատ միջազգային ներդրումներ ապահովել համայնքներում, իսկ դրանց վերահսկողությունը դարձնել ավելի արդյունավետ: 866 համայնք կառավարելը շատ ավելի դժվար և պակաս արդ յունավետ է: Օրինակ՝ մի համայնքում կա գործարան, մյուսում՝ մանկապարտեզ, երրորդում՝ հանրակրթական ու երաժշտական դպրոց, իսկ չորրորդում' մշակութային կենտրոն, մինչդեռ, հարակից գյուղում դրանց մի մասը բացակայում է: Այնպես պետք է անենք, որ ոչ մի համայնքի ոչ մի երեխա չմնա, օրինակ, առանց երաժշտական կրթության: Խոշորացման ծրագիրը ենթադրում է, որ այս բոլոր համակարգերը կարող են օգտագործվել փնջում ներառված համայնքների բնակիչների կողմից հավասարապես: Միջհամայնքային կապը ակտիվացնելու համար միջոցները չեն խնայվի դրանք կապող ճանապարհների բարեկարգման համար, իսկ բնակիչների համար կգործի միջհամայնքային տրանսպորտ»- տեղեկացրել է Արմեն Երիցյանը:

ՏԿԱԻ նախարարը շեշտել է, որ համայնքների խոշորացման ծրագիրը կառավարության կողմից պարտադրվող բարեփոխում չէ: Ծրագրի մեկնարկի համար մայիսի 17-ին նախատեսված է անկացնել տեղական հարնաքվեներ, որոնց միջոցով էլ բնակիչները կորոշեն՝ համաձայն են ծրագրի իրականացմանը, թե ոչ:

ՏԿԱԻ նախարարի հետ զրույցում բնակիչները բարձրաձայնել են իրենց հուզող հարցերն ու համայնքներում առկա խնդիրները, որոնք հիմնականում վերաբերել են աշխատատեղերի ստեղծմանը, միջհամայնքային հողերի ու արոտավայրերի տնօրինմանը, գյուղտեխնիկայի պակասի, ճանապարհների, կրթական-մշակութային համակարգի խնդիրների լուծմանը:

Պատասխանելով համայնքների խոշորացման ծրագրի վերաբերյալ գյուղացիներին հուզող հարցերին՝ ՏԿԱԻ նախարարը նշել է նաև, որ խոշորացման ծրագրի արդյունքում համայնքային հողերի և արոտավայրերի ավելի արդյունավետ օգտագործում կապահովվի, իսկ գյուղերն իրենց անունները և ավադույթները չեն փոխելու, պարզապես կոչվելու են բնակավայրեր, որոնք ընդգրկված են մեկ համայնքում: Համայնքը ունենալու է մեկ ղեկավար, սակայն գյուղապետերը նույնպես շարունակելու են աշխատել իրենց գյուղերի համար, իսկ համայնքներին հատկացվող բյուջեն որևէ կերպ չի կրճատվելու, ընդհակառակը՝ այն ավելանալու միտում ունի: Նախարարի խոսքով, համայնքների խոշորացման ծրագիրը որևէ փաստաթղթային բարդություն չի առաջացնելու գյուղացիների համար:

«Յուրաքանչյուր գյուղ ունենալու է իր ղեկավարը, որը լիազորված կլինի տեղեկանքներ տրամադրել տեղի բնակչին, և գյուղացին ստիպված չի լինի անհրաժեշտ փաստաթղթի համար երկար ճանապարհ կտրել: Համայնքի կենտրոնում լինելու են նոտարական և քաղաքացիական կացության ակտերի գրանցման գրասենյակներ»,- եզրափակել է Արմեն Երիցյանը: Գյուղացիների այն հարցին, թե ինչպես են բաշխվելու համայնքային բյուջեները և արդյոք փոքր բնակավայրերը չեն մատնվի անուշադրության՝ նախարար Երիցյանը պատասխանել է, որ բնակավայրերին տրամադրվող միջոցները լինելու են թիրախային և վերահսկվելու են կառավարության կողմից:

Լրագրողների հետ զրույցում Տավուշի փոխմարզպետ Լևոն Սարգսյանը, ինչպես նաև համայնքների խոշորացման պիլոտային ծրագրում ընդգրկված գյուղերի ղեկավարները նշել են, որ բնակչությունը ծրագրի հետ կապված իրազեկման որոշակի խնդիրներ ուներ, սակայն ՏԿԱԻ նախարարի բացատրական աշխատանքներից հետո գյուղացիների շրջանում նկատվում է դրական վերաբերմունք, և նրանք պատրաստ են դրա պիլոտային տարբերակի գործարկմանը: