ԱԺ բակում տեղի ունեցավ Ցեղասպանության 100-րդ տարելիցին նվիրված հուշարձանի բացումը

Ազգային ժողովի բակում տեղի ունեցավ Հայոց ցեղասպանության 100-րդ տարելիցին նվիրված հուշարձանի բացման արարողությունը, որին մասնակցում էին ԱԺ նախագահ Գալուստ Սահակյանը, ԱԺ աշխատակազմը, պատգամավորներ:

ԱԺ նախագահ Գալուստ Սահակյանն ընդգծեց, որ Հայոց ցեղասպանության 100-րդ տարելիցի կապակցությամբ բացվող հուշարձան-ցայտաղբյուրի ծնունդը հայ ժողովրդի պատմության ամենաողբերգական էջի յուրատեսակ ընդհանրացումն է: «Մեզանից յուրաքանչյուրը գենետիկական ինչ-որ մի թելով, հիշողության ինչ-որ մի հատվածով տոհմածառի առնվազն մի հեռավոր ու աննշան մասով կապված է այդ էջի հետ: Դա ոչ միայն մեր պատմության ամենաողբերգական էջն է, այլև հիշեցում մարդկության դեմ իրագործված ամենասարսափելի հանցագործությունների մասին: Բնականաբար, այս հուշաքարը խորհրդանշական իմաստ ունի՝ հավերժացնելով Մեծ եղեռնի միլիոնավոր զոհերի հիշատակը, սակայն նրա էությունը չէր փոխվի, եթե այն նվիրված լիներ թեկուզ Ցեղասպանության մեկ զոհի հիշատակին, ավելի ճիշտ՝ չէր փոխվի նրա ներքին ասելիքն առ մարդկություն: Ասելիք, որի մեջ կա հիշողություն, ուժ ու հավատ»,- «Արմենպրես»-ի հաղորդմամբ՝ ընդգծեց Սահակյանը:

ԱԺ նախագահն ընդգծեց, որ Հայոց ցեղասպանության 100-րդ տարելիցը յուրատեսակ սահման է հանցագործության և մարդասիրության միջև, սահման անցյալի և ապագայի միջև, սահման պատմության և հիշողության միջև: «Սակայն եթե հանցագործության և մարդասիրության պարագայում խոսքը բաժանարար գծերի մասին է, ապա մյուս դեպքերում սահմանն ունի միավորող նշանակություն: Այս հուշարձանը անցյալի հիշատակ լինելուց բացի ուղերձ է նաև ապագային: Ուղերձ վերածնված, տոկունությունն ու լավատեսությունը չկորցրած, Ցեղասպանությունից հետո էլ հաղթանակներ կերտած ժողովրդի կողմից առ այն, որ ոչ միայն հիշում ենք և պահանջում, այլև կարող ու պարտավոր ենք լինել ուժեղ ու զարգացած՝ դրանով իսկ նվազագույնը ճանաչում և դատապարտում պահանջելով: Այսօր տնկվող 100 ծառերը ոչ միայն հիշողություն են լինելու, այլև վստահություն ապագայի հանդեպ, հաղթանակներ կերտելու շարունակական ավանդույթին հավատարիմ մնալու հաստատուն վկայություն»,- եզրափակեց Սահակյանը՝ պատգամավորներին հրավիրելով մասնակցել Ազգային ժողովի այգում կայանալիք ծառատունկին:

Միջոցառման ավարտին ԱԺ պատգամավորները խորհրդարանի բակում Հայոց ցեղասպանության 100-րդ տարելիցը խորհրդանշող 100 ծառ տնկեցին: