Բունդեսթագի նախագահն արտասանեց «Ցեղասպանություն» բառը և կոչ արեց Թուրքիային առերեսվել սեփական պատմությանը

Գերմանիայի Բունդեսթագի նախագահ Նորբերթ Լամերթը 1915-ի եղելությունն անվանեց ցեղասպանություն: «Արմենպրես»-ի փոխանցմամբ' Գերմանիայի խորհրդարանում այս պահին ընթանում է լիագումար նիստը, որի օրակարգի առաջին հ րցը 1915-ին Օսմանյան կայսրությունում հայերի ցեղասպանությունը ճանաչող նոր բանաձևի քննարկումն է:

Նիստը բացեց Բունդեսթագի նախագահ Նորբերթ Լամերթը, ով 1915 թվականի Օսմանյան կայսրությունում տեղի ունեցած պատմական դեպքերն անվանեց ցեղասպանություն: «Ցեղասպանությունն արժանի է խստագույն պատժի։ Այն բնութագրվում է որպես ազգային, էթնիկ, ռասայական և կրոնական խմբի ոչնչացում: Դա այն է, ինչ տեղի ունեցավ ողջ աշխարհի առաջ, և դա ցեղասպանություն էր, որը վերջինը չէր 20-րդ դարում։ Գերմանացիները սեփական փորձից ելնելով կոչ են անում մյուսներին առերեսվել իրենց պատմությանը, եթե անգամ դա ցավալի է։ Դա հայ և թուրք ազգերի հաշտեցման պայմանն է։ Դրանում իրենց մեղքի բաժինն ունեցան գերմանացիները, որոնք Օսմանյան կայսրության հետ դաշինքը մարդկային կյանքերից վեր դասեցին»,- ասաց խորհրդարանի նախագահը:

Իսկ «Դաշինք 90/ Կանաչներ» կուսակցության համանախագահ Ջեմ Օզդեմին իր ելությում հիշատակեց Հրանտ Դինքին և հույս հայտնեց, որ Հայաստանն ու Թուրքիան կկարողանան կարգավորել իրենց հարաբերությունները: Գերմանիայի Սոցիալ-դեմոկրատական կուսակցության անդամ Ֆրանկ Շվաբեն նույնպես խոսեց հայ-թուրքական հարաբերությունների մասին' ընդգծելով. «Ես կցանկանայի, որ այս պետությունները հարյուր տարի անց վերջապես կարողանային միասնական որոշման գալ»: Իսկ նույն կուսակցությունը ներկայացնող Դիթմար Նիթանը խոսեց ցեղասպանութան զոհերի ժառանգներից ներողություն խնդրելու անհրաժեշտության մասին: «Ես լիահույս եմ, որ Թուրքիայում մարդիկ կհասկանան և կընդունեն իրենց պատմությունը, քանի որ դա եղելությունն է: Գնալով ավելի ու ավելի շատ թուրքեր են հետաքրքրվում իրենց պատմությամբ: Մենք չենք կարող մարդկանց հիշողությունից ջնջնել իրենց հայրենիքի մասին հուշերը, քանի որ դրանք նաև ենթագիտակցաբար փոխանցվում են նոր սերունդներին»,- ասաց պատգամավորը:

Գերմանիայի ամենախոշոր խմբակցությունների առաջադրած բանաձևում մասնավորապես նշվում է. «Մեկ միլիոնից ավելի էթնիկ հայերի ծրագրված բնաջնջումը և արտաքսումը 20-րդ դարում իրականացված զանգվածային բնաջնջման, էթնիկ զտումների, արտաքսումների և ցեղասպանության օրինակ է»: Բանաձևով ճանաչվում է նաև հույների և ասորիներին ցեղասպանությունն օսմանյան թուրքերի կողմից:

Դաշնային կառավարությունը դիվանագիտական նկատառումների ելնելով սկզբում խուսափում էր «ցեղասպանություն» բառն օգտագործելուց:

Գերմանիայի խորհրդարանը դեռևս 2005 թվականին ընդունել է 1915 թվականին Օսմանյան կայսրությունում հայերի զանգվածային բնաջնջման, էթնիկ զտումների և աքսորի մասին բանաձև, որում սակայն նշված չի եղել «ցեղասպանություն» բառեզրը:

Գերմանիայի դիրքորոշման մեջ շրջադարձ տեղի ունեցավ 2015թ. ապրիլի 20-ին' Գերմանիայի Դաշնության արտաքին գործերի նախարար Ֆրանկ-Վալտեր Շտայնմայերի և կանցլեր Անգելա Մերկելի խոսնակ Շտեֆան Զայբերթի հայտարարություններից հետո: Իսկ Գերմանիայի Դաշնության Նախագահ Յոահիմ Գաուկն ապրիլի 23-ին Բեռլինի Մայր տաճարում կայանացած Հայոց ցեղասպանության հիշատակի արարողությանն իր ելույթում հայերի կոտորածները «ցեղասպանություն» է որակել: