Իրանը սպառնացել է ԱՄՆ-ին՝ նավթի գինը կարող է հասնել 200 դոլարի

Իրանը հայտարարել է, որ ԱՄՆ-ի նոր հարվածները երկրի հարավային շրջաններին կարող են հանգեցնել նավթի համաշխարհային գների կտրուկ աճի՝ մինչև 200 դոլար մեկ բարելի դիմաց։ Այս մասին հայտարարել է Իրանի զինվորական «Խաթամ ալ-Անբիա» կենտրոնական շտաբի ներկայացուցիչ Էբրահիմ Զոլֆաղարին։

Նրա խոսքով՝ Վաշինգտոնը «հասկանում է միայն ուժի լեզուն», և եթե ամերիկյան ռազմական գործողությունները շարունակվեն տարածաշրջանում, որևէ համաձայնության հասնել հնարավոր չի լինի։ Զոլֆաղարին X սոցիալական ցանցում գրել է. «Պատրաստվեք նավթին՝ 200 դոլար մեկ բարելի դիմաց»։

Ավելի վաղ ամերիկյան ուժերը հարվածներ էին հասցրել Իրանի հարավում գտնվող հրթիռային կայանքներին և նավակներին, որոնք, ըստ ԱՄՆ-ի, փորձել էին ականապատել Պարսից ծոցը։ Միևնույն ժամանակ ԱՄՆ պետքարտուղար Մարկո Ռուբիոն հայտարարել էր, որ Վաշինգտոնը դեռ տեսնում է Իրանի հետ միջուկային հարցով ժամանակավոր համաձայնության հասնելու հնարավորություն։ Թեհրանը, իր հերթին, հայտնել է, որ միջուկային բանակցությունները հնարավոր կլինեն միայն ռազմական գործողությունների ավարտից հետո։