Եվրահանձնաժողովը հավանություն է տվել Հունաստանին օգնելու ծրագրին

Եվրահանձնաժողովը հավանություն է տվել Հունաստանի ֆինանսական օգնության երրորդ ծրագրին, որով նախատեսվում է այդ երկրին տրամադրել 86 մլրդ եվրո: Փոխըմբռնման մասին հուշագիրը, որն ամրագրում է վարկերի հատկացման պայմանները, ստորագրել է ԵՀ-ի փոխնախագահ Վալդիս Դոմբրովսկիսը: Ինչպես տեղեկացնում է «Արմենպրես»-ը, այդ մասին նա հայտնել է Twitter-ի իր միկրոբլոգում:

Եվրոպայի կայունացման մեխանիզմի (ESM) 13 մլրդ եվրոյի չափով առաջին վարկաբաժինն Աթենքը կստանա օգոստոսի 20-ին: Ըստ Bloomberg գործակալության տեղեկատվության՝ եւս 10 մլրդ եվրո կուղարկվի առանձին հաշվի, այդ գումարը կարող է օգտագործվել երկրի բանկերի վերակապիտալացման համար: Բացի այդ, ESM-ն մինչեւ նոյեմբերի վերջը կփոխանցի 3 մլրդ եվրո:

Գերմանիայի խորհրդարանը (Բունդեսթագ) օգոստոսի 19-ին կայացած արտահերթ նիստում նույնպես քվեարկել Է Հունաստանին նոր ֆինանսական օգնություն տրամադրելու օգտին: Օգոստոսի 14-ին Եվրախումբը որոշում Է ընդունել մինչեւ 86 մլրդ եվրո ծավալով Հունաստանի օգնության երրորդ եռամյա միջազգային ծրագրի գործարկման վերաբերյալ: Դրան Արժույթի միջազգային հիմնադրամի մասնակցությունը հարցականի տակ Է մնում. այդ հարցը հոկտեմբերին քննարկվելու Է Հիմնադրամի կառավարիչների խորհրդում: Ինչպես հայտարարել Է ԱՄՀ-ի կարգադրիչ տնօրեն Քրիստին Լագարդը, Հիմնադրամը շարունակում Է պնդել Հունաստանի պարտքի Էական վերաձեւակերպումը, որը գերազանցում Է 315 մլրդ եվրոն՝ երկրի ՀՆԱ-ի 175 տոկոսը: ԱՄՀ-ն այն կարծիքին Է, որ առանց դրա Աթենքն ի վիճակի չի լինի պարտքերն ինքնուրույն սպասարկել նույնիսկ երրորդ ծրագրի ավարտից հետո: Իրենց հերթին եվրոգոտու երկրներն առայժմ պատրաստ չեն գնալ այդ քայլին: