Սիրիայում բնակվող հայերի ընտանիքը հայրենիք է վերադարձել` ԻԼԻՊ-ից փրկվելով. LifeNews-ի անդրադարձը

52-ամյա Սերոբ Թովմասյանի ընտանիքը ստիպված լքել է Սիրիան: ԻԼԻՊ-ի զինյալների պատճառով նրանք զրկվել են տանիքից: Գրեթե մեկ տարի ընտանիքն անցկացրել է Թուրքիայի ճամբարային քաղաքում, և միայն Հայոց պատրիարքարանի աջակցության շնորհիվ նրանց հաջողվել է վերադառնալ հայրենի հող: Այս մասին տեղեկացնում է LifeNews-ը:

Սիրիայում նրանք ընդարձակ տուն են ունեցել և դարբնոց: Սերոբի կինը զբաղվում էր հողագործությամբ, իսկ բոլոր չորս երեխաները հաճախում էին դպրոց: Կյանքն ապահով էր, քանի դեռ քաղաք չէին ներխուժել ԻԼԻՊ-ի գրոհայինները:

«Տունը հավասարեցրել են հողին: Ոչինչ չի մնացել` մեքենան, խանութները, որոնք մենք ունեցել ենք` ամբողջը ոչնչացրել են: Մեզ տանկերից, ռազմական օդանավերից են հարվածում»,-ասել է Թովմասյանը:

Այդ իրավիճակում, Սերոբն ու նրա եղբայրը ստիպված են եղել լքել երկիրը: Ինչպես Սիրիայի շատ այլ խաղաղ քաղաքացիներ` նրանք ընտանիքների հետ գնացել են Թուրքիա: Փախստականների համար նախատեսված ճամբարային քաղաքում` տասներեք հոգու համար հատկացրել են փոքր սենյակ:

Նման պայմաններում հարազատներն ապրել են մեկ տարի: Թովմասյանները հուսով էին, որ Սիրիայում իրավիճակը կբարելավվի և նրանք կկարողանան վերադառնալ սովորական կյանքին: Սերոբի եղբայրը նույնիսկ գնացել է հայրենի քաղաքը, սակայն հարազատների մոտ այլևս չի վերադարձել. նրան սպանել են զինյալները:

Փախստականներին օգնության ձեռք է մեկնել Հայոց պատրիարքարանը: Արքեպիսկոպոս Արամ Աթեշյանն անձամբ դիմել է Թուրքիայի արտաքին գործերի նախարարությանը, այնուհետև Հայաստանի իշխանություններին: Իսկ մեկ տարի անց, Սերոբը և նրա ընտանիքը ոտք են դրել հայրենի հողի վրա: Նրանց համար  ավարտվել են փորձությունները, սակայն, ըստ ՀՀ սփյուռքի նախարարության, շուրջ 100 հազար հայ շարունակում է մնալ փախստականների ճամբարներում և գրոհայինների վերահսկողության տակ գտնվող տարածքներում: Եվ նրանք կարող են միայն սպասել ու հուսալ, որ իրենց պատմությունը կավարտվի նունքան բարեհաջող: