Կալանավորներին տրված արտոնությունները Չախալյանին չեն վերաբերվում

Lurer.com–ի տեղեկություններով, քաղբանտարկյալ ջավախահայ քաղաքական գործիչ Վահագն Չախալյանն արդեն 10 օր է չի զանգել տուն, որի պատճառով նրա ընտանիքի անդամներն անհանգստացել են։

«Երկիր» Հասարակական կազմակերպության տեղեկություններով, Վահագնի չզանգահարելու փաստը կապված է եղել այն բանի հետ, որ վերջինս դեռ չունի հեռախոսից լիարժեք օգտվելու հնարավորություն։ Նրա հայտարարած հացադուլից հետո Վրաստանի իշխանությունների հրամանով, բավականաչափ մեղմացվել էին նրա հանդեպ բանտապահների վերաբերմունքը։ Դրական է հատկապես այն, որ բանտարկյալին արդեն կարող է այցելել հայ հոգևորական։ Բացի այդ, հնարավորություն է ստեղծվել բանտախցում տարաների մեջ ջուր պահել։ Ասենք, որ նախկինում դա արգելված էր և մի շարք անհարմարություններ էր ստեղծում։

Այսօր Վահագն Չախալյանի հարցը քննում է Եվրադատարանը։ «Երկիր» ՀԿ–ի ծրագրերի համակարգող Ռոբերտ Թաթոյանի խոսքերով, Եվրադատարանը չի կարող այս հարցին չտալ արժանի լուծում։ Բանն այն է, որ Չախալյանի դատավարության ժամանակ դատն անցել է վրացերեն լեզվով, դատապարտյալը բազմիցս խնդրել է, որպեսզի թարգմանություն լինի, սակայն այդ խնդրանքը չի բավարարվել, ավելին՝ անտարբերության է մատնվել։ Չախալյանն անգամ չի հասկացել, թե ի՞նչ դատավճիռ է կայացվել։ Թաթոյանն ասում է, որ Ջավախքում ամեն մարդ գիտի, թե ինչի՞ համար է կալանավորված Չախալյանը և նրանցից յուրաքանչյուրը կրում է այդ պատիժն իր հոգու խորքում։

Ավելացնենք նաև, որ Վրաստանի կառավարությունը բանտարկյալներին տվել է լրացուցիչ արտոնություններ՝ կարճատև ու երկարատև հանդիպումներ ընտանիքի անդամների հետ, վիդեոհանդիպման հնարավորություն։ Սակայն փաստ է, որ Չախալյանն այդ արտոնություններից զրկված է։