Արթուր Դավթյանն ԱԱ-ում հավաքած միավորների շնորհիվ հնարավորություն կստանա պայքարելու Օլիմպիական խաղերին նախորդող «Թեստ իվենթին»

Մարմնամարզության Հայաստանի հավաքականի անդամ Արթուր Դավթյանն աշխարհի առաջնությունում հավաքած միավորների շնորհիվ հնարավորություն կստանա պայքարելու Ռիոյում ապրիլին կայանալիք Օլիմպիական խաղերին նախորդող «Թեստ իվենթին»: Աշխարհի առաջնությունում գրանցած արդյունքը կրկնելու դեպքում նա իրավունք կստանա մասնակցելու Օլիմպիական խաղերին:

«Հայաստանը ներկայացնող մարմնամարզիկներից Արթուր Դավթյանը գերազանցեց մեր սպասելիքները: Արթուրը կատարեց իր վարժությունները շատ լավ և հավաքելով 84, 974 միավոր և զբաղեցրեց 21-րդ հորիզոնականը: Նա իրավունք ստացավ մասնակցելու Ռիո դե Ժանեյրոյում ապրիլին կայանալիք «Թեստ իվենթին»: Մարմնամարզիկներից Վահագն Դավթյանը (օղակներ) և Հարություն Մերդինյան (նժույգթափեր) դուրս են եկել եզրափակիչ և հոկտեմբերի 31-ին ու նոյեմբերի 1-ին կպայքարեն ուղեգրերի համար: Իրենց գործը քիչ ավելի դժվար կլինի: Անհատական ձևերում միայն մեդալ նվաճելու դեպքում մեր մարզիկները իրավունք կստանան մասնակցելու Օլիմպիական խաղերին»,- մարմնամարզության հավաքականի գլխավոր մարզիչ Հակոբ Սերոբյանի խոսքը մեջբերում է ՀԱՕԿ-ի պաշտոնական կայքը:

Հոկտեմբերի 23-ից նոյեմբերի 1-ը Գլազգոյում անցկացվում է մարմնամարզության աշխարհի առաջնությունը, որը վարկանիշային է 2016 թվականի Օլիմպիական խաղերի համար: Հայաստանը ներկայացնում են Վահագն Դավթյանը, Հարություն Մերդինյանը, Արթուր Դավթյանը և Հուռի Գեբեշյանը: Մարմնամարզիկ Հուռի Գեբեշյանը իրավունք է ստացել մասնացելու Ռիոյում կայանալիք «Թեստ իվենթին» և աշխարհի առաջնությունում գրանցած արդյունքը կրկնելու դեպքում կլինի առաջին հայ մարմնամարզիկը, ով Հայաստանը կներակայացնի Օլիմպիական խաղերի կանանց մարմնամարզությունում: