Իգոր Պոպովը մանրամասներ է պատմել Բակո Սահակյանի և ՄԽ համանախագահների հանդիպումից

ԼՂՀ նախագահ Բակո Սահակյանը հոկտեմբերի 27-ին ընդունել է ԵԱՀԿ Մինսկի խմբի համանախագահներ Իգոր Պոպովին, Պիեռ Անդրիոյին, Ջեյմս Ուորլիքին, ԵԱՀԿ գործող նախագահի անձնական ներկայացուցիչ, դեսպան Անջեյ Կասպշիկին և նրանց ուղեկցող անձանց: «Արմենպրես»-ի հաղորդմամբ' հանդիպումից հետո լրագրողների հետ ճեպազրույցում Իգոր Պոպովը նշել է, որ նախագահի հետ քննարկել են ղարաբաղյան հակամարտության քաղաքական կարգավորման գործընթացներին վերաբերող հարցեր:

«Խոսել ենք Հայաստանի և Ադրբեջանի նախագահների հերթական հանդիպման մասին, որը մենք պատրաստվում ենք կազմակերպել: Խոսել ենք նաև հումանիտար հարցերից և այդ համատեքստում հայ և ադրբեջանցի հասարակությունների ներկայացուցիչների հանդիպումներ կազմակերպելու հնարավորության մասին: Այնուամենայնիվ, քննարկման գլխավոր հարցը եղել է շփման գծում տիրող իրավիճակը: Մեզ համար անընդունելի է այն, որ իրավիճակը սրվում է սահմանում, և ծանր զինատեսակներ են կիրառվում: Մենք կհանդիպենք և այդ խնդրի շուրջ քննարկումներ կունենանք նաև բանակի ներկայացուցիչների հետ,- «Արցախպրես»-ին մանրամասնել է Իգոր Պոպովը:

Հոկտեմբերի 27-ին համանախագահները մասնակցելու են Մարտակերտ-Թարթառ ճանապարհահատվածում ԵԱՀԿ առաքելության կողմից իրականացվելիք ԼՂՀ և Ադրբեջանի զինված ուժերի շփման գծի դիտարկմանը: Դիտարկման ժամանակ ԵԱՀԿ Մինսկի խմբի համանախագահները և ԵԱՀԿ գործող նախագահի անձնական ներկայացուցիչն անցնելու են ադրբեջանական տարածք՝ ԼՂՀ կողմից: