Ջուլֆալակյանը շարունակում է հաջող ելույթները գերմանական ակումբում

2015/2016թթ մրցաշրջանում Արսեն Ջուլֆալակյանը շարունակում է իր ելույթները «Աալեն-05»-ի կազմում ու մասնակցել է այս թիմի անցկացրած 8 հանդիպումներից երկուսին ու երկուսում էլ համոզիչ հաղթանակներ է տարել: Այսպես, «Շրիեշեյմի» հետ մրցամարտում 28-ամյա Ջուլֆալակյանը 7:0 հաշվով առավելության հասավ 2005 թ երիտասարդների աշխարհի և Եվրոպայի փոխչեմպիոն, 29-ամյա ռումինացի Իոնել Պուսկասուի նկատմամբ ու թիմային 2 միավոր պարգևեց «Աալեն-05»-ին: Իսկ երկրի չեմպիոնհետ սկզբունքային հանդիպման ժամանակ 4:0 հաշվով պարտության մատնեց Գերմանիան ներկայացնող Ալեքսանդր Սեմիսուրովին և թիմային թանկարժեք 4 միավոր շահեց: Այս մասին տեղեկացնում է ըմբշամարտի պաշտոնական կայքը:

Նկատենք, որ ընթացիկ մրցաշրջանում «Աալեն-05»-ի մեկնարկն այնքան էլ հաջող չստացվեց ու սեպտեմբերի 18-ից սկսված մրցապայքարում Ջուլֆալակյանի թիմը 1-6-րդ տուրերում անցկացրած 6 հանդիպումներից միայն մեկ հաղթանակ էր տարել՝ 15:13 հաշվով երկրի չեմպիոն «Նենդինգենի» նկատմամբ, իսկ մյուս 5 հանդիպումներում զիջել էր մրցակիցներին: Սակայն վերջին երկու հանդիպումներում «Աալեն-05»-ի ելույթներն արդեն հուսադրող են: Գերմանիայի «հայկական» թիմը 7-րդ տուրում 14:11 հաշվով պարտության մատեց «Իսպրիգենին», իսկ 8-րդ տուրում՝ 14:12 հաշվով «Վայնգարտենին» և նկատելիորեն շտկեց մրցաշարային գործերը: