Չզբաղվել ինքնաբուժմամբ. Առողջապահության նախարարության հորդորը

Հանրապետությունում գրանցված ցուրտ եղանակային պայմանները հաշվի առնելով դեռևս 2015թ. դեկտեմբերի 30-ից' ՀՀ առողջապահության նախարարությունում ձևավորվել է առկա աշխատանքային խումբ, որը համակարգում է ինչպես վարակիչ, այնպես էլ ոչ վարակիչ հիվանդություններով պայմանավորված իրավիճակը: Այս մասին ԼՈՒՐԵՐ.com-ին տեղեկացրին ՀՀ Առողջապահության նախարարության մամուլի բաժնից:

Պարբերաբար և առանձին դեպքերի վերաբերյալ հանրապետության տարբեր բժշկական կազմակերպություններում հրավիրվում են կոնսիլիումներ և քննարկումներ, ներկայացվում է ընթացիկ իրավիճակը, տրվում են համապատախան լուծումներ:

Նշենք, որ հիմք ընդունելով տոնական օրերին համաճարակաբանական վերլուծության արդյունքները' հանրապետությունում սուր շնչառական վարակներով հիվանդացությունը նախորդ տարվա միևնույն ժամանակահատվածի համեմատ գտնվում է միևնույն մակարդակի վրա: Սակայն, տոնական օրերին, դիմելիությունը բժշկական կազմակերպություններ պայմանավորված սուր շնչառական վարակներով և թոքաբորբերով ակտիվացել է, որին նպաստել է վերջին օրերին օդի ջերմաստիճանի կտրուկ նվազումը: Թոքաբորբերի ակտիվացումը այս ժամանակահատվածում պայմանավորված է նաև քաղաքացիների' հատկապես հղիների, քրոնիկ հիվանդություններով տառապող անձանց և երեխաների բժշկական օգնության ուշ դիմելիությամբ և ինքնաբուժմամբ: Այսօր հանրապետությունում շրջանառվող գրիպի հարուցիչների դեմ լիարժեք պայքարելու համար ևս մեկ անգամ հիշեցնում և հորդորում ենք բնակչությանը'

• գրիպանման երևույթների դեպքում անհապաղ դիմել բժշկական օգնության
• չզբաղվել ինքնաբուժմամբ
• անհարկի չօգտագործել հակաբիոտիկներ
• հագնվել եղանակին համահունչ
• հետևել անձնական հիգիենայի կանոններին
• պահպանել հազալու և փռշտալու վարվելակարգը
• հնարավորինս սահմանափակել հատկապես գրիպանման երևույթներ ունեցող անձանց հետ շփումները
• հաճախակի օդափոխել փակ տարածքները
• տանը կամ հանրային վայրերում ապահովել օդի օպտիմալ ջերմաստիճան: