Ձեր ձախողումները չեք կարող արդարացնել կախարդական փայտիկների բացակայությամբ

Երբ ժամանակին վարչապետ Հովիկ Աբրահամյանն ասաց կախարդական փայտիկի մասին իր հայտնի արտահայտությունը, դրանով փաստորեն ուզում էր իրեն ապահովագրել հետագա անհաջողղությունների համար պատասխանատվություն ստանձնելուց: Չէ՞ որ շատ հարմար տարբերակ է՝ կախարդական փայտիկ չունեմ, հետևաբար շատ բան մի պահանջեք...

Պարզվում է՝ այս հնարքը կարծես թե դուր է եկել որոշ ՀՀԿ-ականների՝ որպես պատասխանատվությունից խուսափելու արդյունավետ միջոց: Պատգամավոր Լեռնիկ Ալեքսանյանը լրատվամիջոցներից մեկին տված հարցազրույցում ասել է, թե «ոչ մեկ կախարդական փայտիկ չունի, որ շրջի՝ մի օրում դառնանք Եվրոպա, ապրենք եվրոպացու պես: 100 տարի հետո էլ չգիտեմ՝ կդառնանք, թե չենք դառնա...»:

Նախ, անհասկանալի է, թե ինչի են բոլորը նպատակ դրել, որ մենք պիտի անպայման ապրենք հենց եվրոպացու նման: Օրինակ Ճապոնիայում կամ Ավստրալիայում կամ էլ տասնյակ այլ ոչ եվրոպական երկրներում էլ մարդիկ բավականին լավ են ապրում և ընդհանրապես՝ երկրագնդի վրա բացի Եվրոպայից եվս 5 աշխարհամաս կա: Եթե նկատի ունեն ուղղակի կենսամակարդակը, սոցիալական վիճակը, ապա պարզապես պետք է ասել, որ մեզ անհրաժեշտ է հասնել բարեկեցության որոշակի աստիճանի, հաղթահարել աղքատությունը, ստեղծել սոցիալական բարվոք վիճակ, ինչը եվրոպականի կամ ասիականի հետ բնավ կապ չունի: Եվ մարդկանց համար կյանքի նորմալ պայմաններ ստեղծելը իշխանությունների նորմալ աշխատանքի դեպքում բնավ 100 տարվա խնդիր չէ ու ոչ էլ կախարդական փայտիկ է պետք դրա համար: Ընդհանրապես գիտության ու տեխնիկայի զարգացման այս դարաշրջանում կախարդանքին հավատում են միայն երեխաները:

Ես հասկանում եմ, որ մեր իշխանական թիմի ներկայացուցիչները շատ են սիրում երեխաներին, դրա համար պարբերաբար վկայակոչում են կախարդական փայտիկը և հեքիաթային այլ մոտիվներ, բայց, հարգելիներս, եկեք մի մոռացեք, որ բացի երեխաներից մեր երկրում նաև մեծեր կան, ովքեր կամա թե ակամա դառնում են ձեր խոսքերի, ելույթների ունկնդիրը, և մեծերին հեքիաթներով կերակրել չեք կարող, ոչ էլ ձեր ձախողումները կարող եք արդարացնել կախարդական փայտիկների բացակայությամբ: Այնպես որ ավելի լավ է ինքնագովեստով զբաղվելու փոխարեն ընդունեք ձեր սխալները և փորձեք վերջապես աշխատել մի քիչ արդյունավետ:

Կարեն Վարդանյան