Դժվար է չհամաձայնվելը

ԱԺ պատգամավոր Խաչատուր Քոքոբելյանը լրատվամիջոցներին մեկին տված իր հարցազրույցում նշել է, որ չի կարողանում օբյեկտիվորեն «մի դրական բան գտնել Եվրասիական տնտեսական միությանն անդամագրվելու այս մեկ տարվա մեջ», նաև չի ավելացել մեր անվտանգության բաղադրիչը:

Անկեղծ ասած, նույնիսկ հաշվի առնելով, որ պատգամավորն ունի ակնհայտորեն արևմտամետ կողմնորոշում՝ միևնույն է, դժվար է չհամաձայնվելը նրա արտահայտած մտքերի հետ, որովհետև, ցավոք, փաստերը դա են ասում:

Մեկ տարվա մեջ ոչ մի դրական բան տնտեսական առումով մենք չտեսանք, մեր կյանքը ոչնչով չլավացավ, այսինքն՝ ԵՏՄ մտնելը մեզ ոչինչ դեռ չի տվել, ընդհակառակը՝ մենք տուժողի դերում ենք. Ռուսաստանի՝ տնտեսական անկայուն վիճակի հետևանքով ռուբլու զգալի անկումից տուժել է Հայաստանի քաղաքացիների զգալի մասը, քանի որ շատերը իրենց եկամուտը ստանում են հենց Ռուսաստանից և հենց ռուբլիով:

Անվտանգության առումով նույնպես առայժմ կոնկրետ միջամտություն չի եղել ռազմավարական գործընկերոջ կողմից: Ադրբեջանի կողմից հրադադարի բոլոր խախտումների դեպքերում ՀԱՊԿ-ն և Ռուսաստանը լռել են, ինչը հանգեցրեց նույնիսկ Սերժ Սարգսյանի՝ ՀԱՊԿ նիստում ունեցած կոշտ ելույթին:

Միգուցե մեկ տարին դեռ շատ քիչ ժամանակ է եզրակացություններ անելու համար՝ հնարավոր է: Տեսնենք՝ կլինե՞ն դրական փոփոխություններ գոնե 2016-ին, թե՞ վերջնականապես կհամոզվենք, որ այդ միության հետ հույս կապելն անիմաստ է:

Կարեն Վարդանյան