Ռուսիո պատրիարքը տգե՞տ է, թուրքասեր-հայատյա՞ց, թե՞ ոչ կոմպետենտ (տեսանյութ)

Մեր «ռազմավարական դաշնակցի» տարբեր ներկայացուցիչներ (ինչպես, օրինակ, Կիսելյովը, Ժիրինովսկին), տարբեր ժամանակներում տարբեր առիթներով մի շարք հիմար մտքեր են արտահայտել, որոնք ունեցել են հակահայկական բովանդակություն: Եվ ամեն անգամ հայկական կողմը փորձել է «ներողամտորեն» մոտենալ այդ մտքերին՝ մեկնաբանելով, թե դա զուտ նրանց անձնական տեսակետն է, որը չի համընկնում պաշտոնական Մոսկվայի տեսակետին: Լավ, Կիսելյովին, Ժիրինովսկիին և նմաններին թողնենք մի կողմ, իսկ եթե ակնհայտ հակահայկական միտք է արտահայտում Ռուսաստանի հոգևոր առաջնո՞րդը, դա՞ էլ է անձնական տեսակետ, դա՞ էլ չպիտի վերագրենք «ռազմավարական դաշնակցին»: Իսկ այ հոգևոր առաջնորդը՝ Ռուսաստանի պատրիարք Կիրիլը, Սուրբ Ծննդյան օրվա հետ կապված իր հարցազրույցի ժամանակ (որը, ի դեպ, նույն Կիսելյովն էր վարում) ո՛չ ավել, ո՛չ պակաս ասել է, թե Օսմանյան կայսրությունում երբեք քրիստոնյաներ չեն ոչնչացվել, այսինքն՝ հայերի ցեղասպանությունը չի եղել: Եվ սա այն դեպքում, երբ Ռուսաստանն աշխարհում երկրորդ պետությունն է Ուրուգվայից հետո, որը ճանաչել է հայերի ցեղասպանությունը: Վլադիմիր Պուտինն էլ այս տարի ապրիլի 24-ին անձամբ եկել էր Երևան՝ մասնակցելու 100-ամյակին նվիրված միջոցառումներին, իսկ ահա նույն ՌԴ-ի հոգևոր առաջնորդն ասում է, թե նման բան չի եղել: Սա ո՞նց հասկանանք...

Իսկ հասկանալ դա կարելի է մի քանի տարբերակով.

1. Ռուսիո պատրիարքը տգետ է, պատմությունից ընդհանրապես տեղյակ չէ և տարրական գիտելիքների չի տիրապետում:

2. Կիրիլը լավ էլ պատմություն գիտի, ցեղասպանության մասին էլ գիտի, պարզապես թուրքասեր է կամ հայատյաց, և դա ի վերջո արտահայտվեց:

3. Միգուցե սա Թուրքիայի հետ հարաբերությունները կարգավորելու քա՞յլ էր (մեծ քաղաքականության մեջ բարեկամներ չկան, առաջնահերթը սեփական շահերն են, ուստի ես ոչնչից չեմ զարմանա):

4. Լեզվի սայթաքում, վրիպում է եղել, ուղղակի այդ դեպքում անհասկանալի է, թե ինչպես է նման վրիպումներ անող մարդը զբաղեցնում նման լուրջ պաշտոն՝ նման խոշոր երկրում: Դա արդեն այդ երկրի օգտին չի խոսում:

Այստեղ նաև մի քանի հարց է առաջ գալիս՝

- ինչպե՞ս կարձագանքի այս հայտարարությանը հայկական կողմը, չլսելու՞ կտա, թե՞, այնուամենայնիվ, արձագանք կլինի, վերջիվերջո «դաշնակից» երկրի հոգևոր առաջնորդն է նման բան ասել

- պաշտոնական Մոսկվան կփորձի՞ շտկել վրիպումը, եթե դա վրիպում է եղել

- հայկական կողմի արձագանքի դեպքում ռուսական կողմը գոնե ինչ-որ ձևով կարձագանքի՞, թե՞ չլսելու կտա

Սպասենք, տեսնենք...

Կարեն Վարդանյան

Կից տեսանյութը դիտել 8-րդ րոպեից.