Կալաձեն և Ալիևը մեկնում են Իրան՝ գազի հարցով

Իրանը պատրաստ է գազ մատակարարել և՛ Վրաստանին, և՛ Եվրոպային: Այս մասին, ինչպես հաղորդում է «Արմենպրես»-ը, հայտարարել է Վրաստանում Իրանի դեսպան Աբբաս Թալեբը:

Վրաստանյան «Ռեզոնանսի» թերթին տված հարցազրույցում իրանցի դիվանագետն ասել է, որ ներկայումս տեխնիկական աշխատանքներ են կատարվում տվյալ հարցի լուծման համար:

Թերթը գրում է, որ տեղեկությունը հաստատել են նաև Վրաստանի էներգետիկայի նախարարությունում' միաժամանակ նշելով, որ պետք չէ շտապել, եզրակացություններ անել:

«Իրանի համար գազի մատակարարումները քաղաքական բնույթի հարց չէ, և ոչ մի երկրի հետ մենք մրցակցության մեջ չենք մտնում: Իրանը պատրաստ է էներգետիկական ոլորտում համագործակցել Վրաստանի հետ և բավարար ծավալով գազ մատակարարել ինչպես ներքին պահանջարկի, այնպես էլ Եվրոպա տարանցելու համար»,- ասել է նա:

Նրա խոսքով՝ իրանական գազը պատրաստ են Վրաստան մատակարարել ինչպես Հայաստանը, այնպես էլ Ադրբեջանը: Մանրամասները պետք է քննարկվեն Վրաստանի էներգետիկայի նախարար Կ. Կալաձեի՝ Թեհրան այցի ընթացքում:

APA-ն շտապել է հայտնել, որ Ադրբեջանի նախագահ Իլհամ Ալիևը պատրաստվում է փետրվարի վերջին այց կատարել Իրան՝ նշելով, որ այս մասին հայտարարել է Ադրբեջանում Իրանի դեսպան Մոհսուն Փաք Այինը: Նրա խոսքով՝ այցը տեղի կունենա Իրանի նախագահ Հասան Ռուհանիի հրավերով:

«Պաշտոնական այցի ժամանակ փաստաթղթեր կստորագրվեն տնտեսական և էներգետիկ ոլորտներում համագործակցության մասին», -ասել է նա:

Չի բացառվում, որ Թեհրանում Ալիևի բանակցությունների թեմաներից մեկն էլ կլինի Վրաստան իրանական գազի տարանցումն Ադրբեջանի տարածքով:

Ադրբեջանական ԶԼՄ-ները նշում են, որ այդ նպատակով Հայաստանի շրջափակված վիճակը պահպանելու համար Ալիևը Թեհրանին գազի փոխադրման գործում «ձեռնտու պայմաններ է առաջադրելու»: