Զավեշտ. «Ադրբեջանի գիտության դերը Ամերիկայի հայտնագործության մեջ»

Տարբեր ժողովուրդների հայրենիքում արհեստականորեն ստեղծված Ադրբեջանի միջնակարգ դպրոցի դասագրքերում աշակերտներին «հայրենասեր» մեծացնելու և Ադրբեջանի, իբր, հին պետություն լինելը «փաստելու» նպատակով «Ադրբեջանի գիտության դերը Ամերիկայի հայտնագործության մեջ» թեզ է առաջ քաշվել: Ինչպես հաղորդում է «Արմենպրես»-ը, զավեշտն այն աստիճանի է, որ դրա նկատմամբ իր հեգնանքը faktxeber.com-ի հետ զրույց ում թաքցնել չի կարողացել Ադրբեջանի խորհրդարանի պատգամավոր Ֆազիլ Մուստաֆան:

«Հետո էլ ասում են, թե ինչու ես քննադատում կեղծ հայրենասերներին և պատմաբաններին: Սրան նայեք' «Ադրբեջանի գիտության դերը Ամերիկայի հայտնագործության մեջ»: Ես դեռ չեմ կարողանում որոշել, թե ինչում է կայանում 21-րդ դարում համաշխարհային գիտության սահմաններում Ադրբեջանի գիտության դերը, իսկ մարդիկ խոսում են 15-րդ դարում Ամերիկայի հայտնագործման մեջ Ադրբեջանի գիտության դերից»,- ասել է նա:

Ֆազիլ Մուստաֆան ևս զավեշտ է համարել միջնակարգ դպրոցի դասագրքում այդ թեզի ներկայությունը աշակերտների հայրենասիրական զգացմունքների մեծացման համար ներկայացվելու մասին պնդումները:

«Վաղը մեկն էլ կվերցնի ու «Ամերիկայի հայտնագործության մեջ Ադրբեջանի գիտությունների ազգային ակադեմիայի պատմաբաններից բաղկացած արշավախմբի դերը» թեմայով գիտական թեզ կպաշտպանի»,- հեգնել է նա:

Ֆազիլ Մուստաֆայի խոսքով՝ ըստ ադրբեջանցի «գիտնականների»՝ Քրիստոֆոր Կոլումբոսն Ամերիկան հայտնագործել է իրենց կողմից «ադրբեջանցի» համարվող վաղ միջնադարյան գրող Նասրեդդին Թուսիի ստեղծագործությունների հիման վրա: «Էդ ո՞ր խելքը գլխին գիտնականը կարող է Նասրեդդին Թուսիի ժառանգությունն անվանել Ադրբեջանի գիտություն: Որևէ մեկը 13-րդ դարի որևէ աղբյուրում Ադրբեջանի մասին գրառում հանդիպել՞ է: Կամ Կոլումբոսը երբ՞ և որտեղ՞ է ասել, թե օգտվել է Թուսիի ժառանգությունից»,- նշել է նա:

Ֆազիլ Մուստաֆան Ադրբեջանի ԳԱԱ «գիտական» մակարդակի վերաբերյալ ևս մի ծիծաղելի օրինակ է բերել: «Մի անգամ մի հարգարժան գիտնական ինձ ասաց, որ իր գիտական թեզի թեման է «Նախնադարյան հասարակության մեջ զբոսաշրջությունը»: Ես չկարողացա թաքցնել ծիծաղս: Մի՞թե նախնադարյան հասարակության մեջ որևէ մեկը կարող էր մտածել զբոսաշրջության մասին: Նավթադոլարների ցայտման ժամանակներում Բաքվում «Տնտեսության Ադրբեջանի մոդելը» թեմայով համաժողով էին կազմակերպել: Այժմ այդ թեման մոռացել են, որովհետև հասկացել են դրա աբսուրդ լինելը: Ուզում ե մ մեր գիտնականներին խորհուրդ տալ, որ իրենց գիտական թեզերի համար համոզիչ անուններ ընտրեն, որպեսզի նրանց նկատմամբ հարգանքն արժեզրկված ադրբեջանական մանաթի չափ չիջնի», -ասել է նա: