Ի՞նչ է ծխում ԱՄՆ-ում Հայաստանի հյուպատոսը

Ընդունված է, որ երբ մի պետության հանդեպ ուզում են ցույց տալ իրենց բացասական, թշնամական վերաբերմունքը, այրում են այդ պետության դրոշը կամ անարգում զինանշանը: Ի՞նչ խոսք, դրոշն ու զինանշանը պետության կարևորագույն խորհրդանիշներից են և պաշտոնյաների, նաև սովորական քաղաքացիների՝ դրանց հանդեպ վերաբերմունքը ցույց է տալիս նրանց վերաբերմունքը հենց իրենց պետության, հայրենիքի նկատմամբ: Իսկ եթե սեփական զինանշանի նկատմամբ թույլատրված է փնթի մոտեցում, դա բացի վերը նշվածներից, ցույց է տալիս նաև տվյալ պաշտոնյաների գրագիտության աստիճանն ու վերաբերմունքը իրենց իսկ աշխատանքին:

Ներկայացվող լուսանկարում Հայաստանի Հանրապետության գլխավոր հյուպատոսությունն է ԱՄՆ-ի Լոս Անջելես քաղաքում: Եթե ուշադիր նայեք՝ կնկատեք, որ ՀՀ զինանշանը շենքի պատին թարս է նկարված: Հասկանում եմ, որ դժվար է պատկերացնելն ու նույնիսկ հավատալը, բայց ստիպված եք հավատալ ձեր աչքերին՝ առյուծը ձախից է, արծիվը՝ աջից, այնինչ պետք է լինի հակառակը: Ասենք 3-րդ դասարանի կրթությամբ ու կյանքում նույնիսկ հեռուստացույց չնայած մեկը միգուցե կարող էր մեր զինանշանի վրա ձախն ու աջը խառնել իրար, բայց նման բան անում է դիվանագիտական կառույցը, այն էլ այն կառույցը, որ ԱՄՆ-ի նման երկրում Հայաստանն է ներկայացնում…
Այստեղ ակամա մի քանի հարցեր է առաջանում.

- Ի՞նչ կրթություն ունեն հյուպատոսն ու հյուպատոսարանի աշխատակիցները, եթե նրանք չգիտեն, թե ինչպիսին պիտի լինի մեր զինանշանը:

- Ունե՞ն արդյոք տեսողական խնդիրներ հյուպատոսն ու հյուպատոսարանի աշխատակիցները, եթե ոչ՝ ապա ինչո՞ւ ամեն օր աշխատանքի գնալով՝ մինչ օրս չեն նկատել, որ զինանշանը թարս է:

- Ինչո՞վ են ընդհանրապես զբաղված հյուպատոսն ու աշխատակիցները, որովհետև իրենց աշխատանքով զբաղվելու դեպքում՝ նման բանը նկատած կլինեին:

Իսկ եթե ընդունենք, որ նկատել են, սակայն միգուցե դա նորմալ են համարում, այստեղից արդեն կբխի հաջորդ հարցը.

- Ի՞նչ է ծխում ԱՄՆ-ում Հայաստանի հյուպատոսը:

Կարեն Վարդանյան