Կիպրոսի քննիչները հարցաքննել են EgyptAir-ի ինքնաթիռն առևանգողին

Աշխարհ 30 Մարտ, 2016 13:26

Եգիպտացի Սեյֆ ադ Դին Մուստաֆան, որը մարտի 29-ի առավոտյան առևանգել էր EgyptAir ավիաընկերության՝ Ալեքսանդրիայից Կահիրե ուղևորվող A320 ինքնաթիռը, Լառնակայի օկրուգային դատարանի որոշմամբ ձերբակալվել է ութ օրով: Այդ մասին, ինչպես տեղեկացնում է «Արմենպրես»-ը, հայտնել է Կիպրոսի լրատվական գործակալությունը: Նրա տվյալներով՝ եգիպտացուն մեղադրանք է ներկայացվել օդահենության, անօրինականորեն պայթուցիկ նյութեր պահելու, մարդկանց առևանգելու և ահաբեկչության մեջ:

Ավելի վաղ հաղորդվել է, որ կիպրոսցի քննիչներն արդեն եգիպտացու հարցաքննություն են անցկացրել: Միևնույն ժամանակ, ինչպես գրում է Phileleftheros թերթը, Եգիպտոսի անվտանգության ծառայությունների, այդ թվում՝ հետախուզության աշխատակիցներն արդեն ժամանել են Կիպրոս՝ անցկացնելու կասկածյալի սեփական հարցաքննությունը:

EgyptAir ավիաընկերության A320 ինքնաթիռն առևանգվել էր մարտի 29-ի առավոտյան Երևանի ժամանակով ժամը 09:05-ին: Առևանգողը՝ 59-ամյա եգիպտացի ռեցիդիվիստ Սեյֆ ադ Դին Մուստաֆան, պահանջել է փոխել երթուղին՝ սպառնալով պայթեցնել իբր իր մարմնին ամրացված մահապարտի գոտին: Ժամը 09:50-ին օդանավը վայրէջք է կատարել Կիպրոսի Լառնակա քաղաքի օդանավակայանում: Դրանից քիչ անց ուղևորների մեծ մասն ազատ է արձակվել առևանգողի կողմից: Մի քանի ժամից նա բաց է թողել մնացած պատանդներին՝ մի քանի օտարերկրացիների և եգիպտացիներից բաղկացած անձնակազմին, իսկ ինքը կամավոր հանձնվել է Կիպրոսի ոստիկանությանը, հաղորդել է ՏԱՍՍ-ը: