Պաշտոնական Անկարան գերմանական հեռուստաալիքից պահանջել է հեռացնել Էրդողանին ծաղրող տեսահոլովակը

Գերմանական ARD հեռուստաալիքով Թուրքիայի նախագահ Ռեջեփ Թայիփ Էրդողանին ծաղրող երգիծական տեսահոլովակի շուրջ իրարանցումը չի դադարում: Ինչպես հաղորդում է «Արմենպրես»-ը, ֆրանսիական AFP գործակալությանն մեկնաբանություն տված թուրք անանուն դիվանագետը հայտնել է, որ իրենք դիմել են գերմանական հեռուստաընկերությանը' պահանելով հեռացնել տեսահոլովակը:

«Նախորդ շաբաթ մենք կանչեցինք Գերմանիայի դեսպանին' հայտնելու մեր բողոքը հոլովակի հեռարձակման հետ կապված, որը դատապարտում ենք: Մենք պահանջել ենք, որ այն անմիջապես հեռացվի»,- հայտնել է թուրք դիվանագետը:

Գերմանական ARD հեռուստաալիքը մարտի 17-ին երգիծական, երկու րոպե տևողությամբ մի տեսահոլովակ էր պատրաստել: Դրանում քննադատվում էր Թուրքիայի նախագահի քաղաքականությունը: Հոլովակում ասվում էր. «Լրագրողը, որը գրում է այն մասին, ինչ դուր չի գալիս Էրդողանին, հաջորդ օրը հայտնվում է ճաղերի հետեւում»: Բացի այդ, ծաղրի էր ենթարկվում Էրդողանի կողմից մարդու իրավունքների ոտնահարումներն, ինչպես նաև քննդատվում նրա վերաբերմունքը քրդերի նկատմամբ' ասելով. «Նա ավելի հակված է ռմակոծել նրանց, քան իր կրոնակից եղբայրներին «Իսլամական պետություն» խ մբավորումից»:

Տեսահոլովակի պատճառով Անկարայում Գերմանիայի դեսպանը կանչվել էր Թուրքիայի ԱԳՆ: