Վախճանվել է բրիտանացի արտիստ Դուգլաս Ուիլմերը՝ Շեռլոք Հոլմսի դերակատարը

96 տարեկան հասակում վախճանվել է բրիտանացի արտիստ Դուգլաս Ուիլմերը՝ Շեռլոք Հոլմսի նշանավոր դերակատարը: Այդ մասին, ինչպես տեղեկացնում է «Արմենպրես»-ը, հայտն է Hollywood Reporter հրատարակությունը:

Արտիստը երկարատև հիվանդությունից հետո մահացել է Անգլիայի արևելքի Սուֆոլքի կոմսության Իսփվիչ քաղաքի հիվանդանոցում:

Ուիլմերը հռչակվել էր Հոլմսի դերով, որը նա 1960-ական թվականներին խաղացել է BBC ընկերության՝ Արթուր Կոնան Դոյլի ստեղծագործության մոտիվներով նկարահանված հեռուստասերիալում: Այնուհետև դերասանին քանիցս հրավիրել են խաղալու նշանավոր խուզարկուի դերը:

2012 թվականին նա էպիզոդիկ դերով հայտնվել է «Շեռլոք» հեռուստատեսային ֆիլմում, որտեղ գլխավոր դերը խաղացել է Բենեդիկտ Քամբերբեթչը:

Դուգլաս Ուիլմերը նկարահանվել է բազմաթիվ կինոնկարներում, որոնք մտել են պատմության մեջ: Առաջին խոշոր դերը նա 1955 թվականին խաղացել է «Ռիչարդ Երրորդ» ֆիլմում, որը բեմադրել է Լոուրենս Օլիվիեն: Նա նաև երկրորդ պլանի դերերում նկարահանվել է հոլիվուդյան այնպիսի հայտնի բլոքբասթերներում, ինչպիսիք են՝ «Կլեոպատրան» (1963 թ.) և «Էլ Սիդ»-ը (1961 թ.), Ջեյմս Բոնդի մասին սերիաներից «Ութոտնուկը» (1983 թ.) բրիտանական ֆիլմում:

Սակայն Ուիլմերն առավել մեծ ճանաչում է ստացել հենց Կոնան Դոյլի հերոսի կերպարով: Ժամանակին դերասանը Սուֆոլքի կոմսությունում «Շեռլոք» անվանմամբ գինետուն ունեցել: Նա եղել է Լոնդոնի Շեռլոք Հոլմսի ընկերության պատվավոր անդամը, որի վարկածով ճանաչվել է այդ դերի լավագույն կատարողը, հաղորդել է ՏԱՍՍ-ը: