Ադրբեջանի պետական նավթային ընկերությունը դադարեցրել է ծրագրված նախագծերը

Ադրբեջանի պետական նավթային ընկերությունը' SOCAR-ը դադարեցրել է 2015 թվականին միջազգային աճուրդ հայտարարած գազային «Ումիդ», «Բաբեկ» գազային նախագծերը:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, հայտարարել է SOCAR-ի նախագահ Ռովնագ Աբդուլլաեւը:

Նրա խոսքով' դա արվել է նավթի համաշխարհային գների անկման հետևանքով նախագծերի վրա ծախսերի' ենթադրվող եկամուտներից ավելի մեծ լինելու պատճառով:

«Նավթի ցածր գները հարկադրում են նվազեցնել նախագծերի վրա ծախսերն ու ներդրումները, ինչը խոչընդոտում է հիշյալ նախագծերի իրականացմանը», -ասել է նա:

«Ազադլըգ» թերթը հայտնել է, որ 2016 թվականի առաջին երկու ամիսներին, 2015 թվականի նույն ժամանակաշրջանի համեմատ, Ադրբեջանի ՀՆԱ-ն 3,4 մլրդ դոլարով կամ 40 տոկոսով նվազել է:

«Թուրան» լրատվական գործակալությունը' հղում կատարելով Ադրբեջանի պետական մաքսային կոմիտեին, հայտնել է, որ Ադրբեջանի արտաքին առևտրաշրջանառությունը 2016 թվականի հունվար-փետրվարին կազմել է 2,2 մլրդ դոլար, ինչը 2015 թվականի նույն ժամանակաշրջանի հետ համեմատ, 45,5 տոկոսով փոքր է:

Ըստ «Ազադլըգ» ռադիոկայանի՝ ադրբեջանցի հայտնի տնտեսագետ Գուբադ Իբադօղլուն համոզմունք է հայտնել, որ «Ադրբեջանի տնտեսության անկումն արդեն երեք ամիս է՝ սկսված է»:

The Financial Times թերթը գրում է, որ Ադրբեջանի արտահանման 95 տոկոսից ավելին կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին: