Սաակաշվիլին արտահերթ ընտրություններ է կանխատեսել Ուկրաինայում

Ուկրաինայի Օդեսա շրջանի նահանգապետ Միխեիլ Սաակաշվիլին հայտարարել է, որ իր կարծիքով՝ մոտ ամիսներին Ուկրաինայում կանցկացվեն արտահերթ խորհրդարանական ընտրություններ:

Նրա խոսքով՝ դրանցում կհաղթեն «երիտասարդ բարեփոխիչները». փոխանցում է «Интерфакс»-ը՝ վրացական «Ռուսթավի-2» հեռուստաընկերության եթերում Օդեսայի նահանգապետի հայտարարությանը հղումով:

«Արտահերթ խորհրդարանական ընտրությունների անցկացման հավանականությունը շատ բարձր է։ Ես կարծում եմ, որ ելնելով Ուկրաինայում այսօրվա իրավիճակից՝ դրանք գրեթե անխուսափելի են առաջիկա ամիսներին»,- ասել է Սաակաշվիլին:

Նա նաև վստահություն է հայտնել «երիտասարդ բարեփոխիչների» հաջողության վերաբերյալ, որոնք, Վրաստանի նախկին նախագահի խոսքով, հավաքվել են իր շուրջը։

«Այսօր այն մարդիկ, ովքեր իմ շուրջն են հավաքվել՝ երիտասարդ բարեփոխիչները, հնարավորություն ունեն հաղթելու Ուկրաինայում ցանկացած ընտրություն: Այդ մասին գիտեն տեղական կլանների և օլիգարխների ներկայացուցիչները, այդ պատճառով նյարդայնանում են, և նրանց ողջ քարոզչությունն ուղղված է իմ դեմ»,- ընդգծել է Սաակաշվիլին։