Լուկաշևիչի մեղադրանքը՝ ուղղված Թուրքիայի իշխանությունների դեմ

ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը Թուրքիայի իշխանություններին մեղադրել է երկրի քաղաքացիական հասարակության նկատմամբ ճնշումներ գործադրելու համար, որոնք քննադատում են երկրի հարավ-արևելքում քրդերի դեմ ռազմական գործողությունները։ Դիվանագետի հայտարարությունը տեղադրվել է Ռուսաստանի ԱԳՆ կայքում, տեղեկացնում է Lenta.ru-ն:

Որպես օրինակ՝ Լուկաշևիչը նշում է «Հանցագործության մասնակից չենք դառնա» ստորագրահավաքին մասնակցած թուրք մտավորականների շրջանում զանգվածային ձերբակալությունները։

«Նոր ճնշումների համար փաստացի ազդակ են դարձել Ռեջեփ Թայիփ Էրդողանի խոսքերը, որով նա գիտնականների քայլը հավասարեցրել էր ահաբեկիչների գործողություններին»,- հավելել է նա։

Խոսելով Թուրքիայում քրդերի իրավունքների խախտումների մասին՝ Լուկաշևիչը «Մարդու իրավունքների թուրքական հիմնադրամի» վիճակագրական տվյալներն է բերել։ Իրավապաշտպանների համաձայն՝ այսպես կոչված՝ հակաահաբեկչական գործողությունների ընթացքում 300 քաղաքացիական անձ է սպանվել։ Միևնույն ժամանակ, ըստ որոշ տվյալների, զոհերի թիվը գերազանցել է 600-ը։

«Քրդերի դեմ օգտագործվել են տանկեր, ավիացիա և հրետանի։ Չնայած միջազգային մարդասիրական իրավունքին՝ ոչ համարժեք ուժ է կիրառվել»,-ընդգծել է դիվանագետը։

Զինված դիմակայությունը պաշտոնական Անկարայի ու քրդերի միջև սրվել է 2015 թվականի ամառվանից՝ Սուրուչում տեղի ունեցած ահաբեկչությունից հետո։