Թուրքիայում ուսուցիչը դատապարտվել է 508 տարվա ազատազրկման անչափահասներին բռնաբարելու համար

Թուրքիայի Քարաման քաղաքում տարրական դպրոցի 54-ամյա ուսուցիչ Մուհառեմ Բյոյուքթուրքը դատապարտվել է 508 տարվա ազատազրկման նվազագույնը 10 երեխայի բռնաբարության համար:

Ինչպես հաղորդում է «Արմենպրես»-ը՝ վկայակոչելով թուրքական ԶԼՄ-ները, ուսուցիչը ձերբակալվել էր մարտի 5-ին «երեխաների նկատմամբ սեռական բռնության», «ազատության սահմանափակման», «գիտակցաբար ֆիզիկական վնաս հասցնելու» և «անվայել նյութեր դիտել հարկադրելու» մեղադրանքներով:

Դատական գործընթացը մեծ արձագանք էր ստացել թուրքական հասարակությունում, ընդդիմադիր կուսակցությունները կատարվածի համար մեղադրել են կառավարությանը:

Մեղադրական եզրակացության մեջ դատախազությունը ուսուցչի համար գործի բոլոր նյութերով պահանջել է 600 տարվա ազատազրկում: Մեղադրյալը չի խոստովանել իր մեղքը՝ հայտարարելով, որ դպրոցի աշակերտները զրպարտել են իրեն:

Այդուհանդերձ, դատարանը նրան մեղավոր է ճանաչել՝ դատապարտելով 508 տարի և երեք ամիս ժամկետով բանտարկության:

Դատաքննության ընթացքում դատարանի շենքի շուրջ անվտանգության բացառիկ միջոցառումներ են ձեռնարկվել, որոնք ապահովել են 900 ոստիկաններ եւ ՆԳՆ-ի հատուկ ջոկատներ: Դա կապված էր իշխանությունների այն մտահոգության հետ, որ հնարավոր էին հասարակական ելույթներ, անկարգություններ, ինչպես նաեւ մանկապիղծ ուսուցչի նկատմամբ ինքնադատաստանի փորձեր: