Ադրբեջանում քրեական գործ է հարուցվել միակ անկախ հեռուստաալիքի 15 լրագրողների դեմ

Ինտերնետային Meydan TV հեռուստաալիքի դեմ Ադրբեջանում քրեական գործ է սկսվել, և դրա գործող անձինք հանդիսանում են հեռուստաալիքի 15 լրագրողները:

Այս մասին, ինչպես հաղորդում է «Արմենպրես»-ը, «Թուրան»-ին հայտնել է փաստաբան Էլչին Սադըգովը:

Նրա խոսքով՝ չնայած դեռևս որևէ մեկին կոնկրետ մեղադրանք չի առաջադրվել, սակայն լրագրողներին արգելվել է երկրից ելքը, որոշների մոտ խուզարկություններ են անցկացվել և սարքավորումներ առգրավվել, ինչն արվել է նրանց վրա ճնշում գործադրելու միջոցով Meydan TV-ի ղեկավարության և գործընկերների դեմ ցուցմունքներ կորզելու նպատակով:

Փաստաբանն ասել է, որ լրագրողներին ապօրինաբար ենթարկել են հարկային ստուգումների և պարբերաբար հարցաքննության են կանչում: Նա չի բացառել նաև հեռուստաալիքի լրագրողների ձերբակալությունը:

Էլչին Սադըգովը քրեական գործը համարում է մտացածին, հիշեցնելով, որ Ադրբեջանում նման հոդվածներով քրեական գործ էր հարուցվել նաև տասնյակ հասարակական կազմակերպությունների դեմ, իսկ նրանց ղեկավարները դատապարտվել են:

Քրեական գործն իշխանություններն, ըստ նրա, հարուցել են Մինգեչաուրում բնակչության բողոքի ակցիայի հետաքննության ժամանակ Meydan TV-ի ցուցադրած տեսանյութի պատճառով, որը պատմել էր այն մասին, թե ինչպես է բերման ենթարկված ցուցարարը խոշտանգումների հետևանքով նետվել ոստիկանության շենքի պատուհանից: Բողոքի ակցիայի տեսանյութի ցուցադրությունը լրջորեն անհանգստացրել է իշխանություններին:

Meydan TV-ն ստեղծվել է 2013 թվականին, նրա գլխավոր գրասենյակը գտնվում է Գերմանիայում: Նախագիծը ղեկավարում է խղճի նախկին բանտարկյալ և բլոգեր Էմին Միլլին:

Միլլին հայտարարել է, որ լրատվամիջոցը չի զբաղվել որևէ անօրինական գործունեությամբ: Ադրբեջանում Meydan TV-ին ոչ մի բիզնես-գործունեություն չունի: Լրագրողների հետ համագործակցում է միայն հասարակական սկզբունքներով: Այդ պատճառով Միլլին գտնում է, որ աբսուրդ է իրենց դեմ ապօրինի ձեռնարկատիրական գործունեության, հարկերից խուսափելու հոդվածներով հետաքննության անցկացումը, քանի որ իրենք հարկային պարտավորությունները կատարում են Գերմանիայի կառավարության հանդեպ:

Meydan TV-ի միակ նպատակը հանդիսանում է միջազգային համաձայնագրերի շրջանակում անկախ պրոֆեսիոնալ լրատվական գործունեության իրականացումը:

«Մեր միակ «հանցագործությունը» ազատ խոսքի մեր իրավունքի օգտագործումն է»,- հայտարարել է Էմին Միլլին:

Նրա կարծիքով` Ադրբեջանում բացված քրեական գործը նպատակ է հետապնդում վախեցնել Meydan TV-ի հետ համագործակցող տեղացի լրագրողներին:

«Ադրբեջանում որևէ անձ չկա, որը լիազորված է խոսել Meydan TV-ի անունից ոչ մի լրագրող պատասխանատու չէ մեր գործունեության համար», -ասել է Միլլին:

Այդ քրեական գործով իշխանությունները խոչընդոտներ են ստեղծում լրագրողական գործունեության համար և ճնշում են դեմոկրատական մթնոլորտը, հայտարարել է նա: