Մոսկվայում ԻՊ-ի հավաքագրողների ձերբակալման պահը ֆիքսվել է տեսախցիկներով (տեսանյութ)

Մոսկվայում «Իսլամական պետություն» ահաբեկչական խմբավորման հետ կապ ունենալու համար կասկածվող անձանց ձերբակալության պահը ֆիքսվել է տեսախցիկներով։ Նրանցից մեկը «Վնուկովո» օդանավակայանի աշխատակցուհի է՝ Սաիդա անունով, հաղորդում է Life-ը:

Կադրերում երևում է, թե ինչպես է կինը դուրս գալիս շքամուտքից, իսկ փողոցում նրան սպասում են Անվտանգության ծառայության աշխատակիցները: Ձերբակալելով Սաիդային՝ նրանք աղջկան հետ են տանում բնակարան, որտեղ բնակվում է նրա քույրը. նա ևս ձերբակալվել է:

Հետո ոստիկանները շքամուտքի մոտ սպասում ու ձերբակալում են երկու երիտասարդների, որոնք աղջիկների մոտ հյուր էին եկել:

Միևնույն ժամանակ, ոստիկանները փողոցում արգելափակում են Lada Priora մեքենան, որը, ենթադրաբար, պատկանում է ծայրահեղականներին։ Դրանից երկու տղամարդ է դուրս բերվել:

Ավելի ուշ պարզվել է, որ բոլոր ձերբակալվածներն ԻՊ-ի համար զինյալներ հավաքագրողներ են: