Ադրբեջանի պետական նավթային ընկերությունը 6 մլրդ դոլարից ավելի պարտք ունի

Ադրբեջանի պետական նավթային ընկերության (SOCAR) ընդհանուր պարտքը կազմում է 6,3 մլրդ դոլար:

Այս մասին, ինչպես հաղորդում է «Արմենպրես»-ը' վկայակոչելով report.az լրատվական կայքը, Բաքվում «Խազար» եվրոպական ակումբի անդամների հետ հանդիպման ժամանակ հայտարարել է SOCAR-ի տնտեսական հարցերով փոխնախագահ Սուլեյման Գասըմովը:

«Ընկերությունը պարտք է Պետական նավթային հիմնադրամին' «Ազերի-Չիրաղ-Գյունեշլի» գազային հանքահորի մասնաբաժինը ստանալու և Բաքվի նավաշինական գործարանի շինարարության հետ կապված: Բացի այդ, պարտք ունենք նաև Միջազգային բանկին, որը պետք է վերադարձնենք 10 տարվա ընթացքում», -հավելել է նա:

SOCAR-ի նախագահ Ռովնագ Աբդուլլաևն ավելի առաջ հայտարարել էր, որ ընկերությունը դադարեցրել է 2015 թվականին միջազգային աճուրդ հայտարարած «Ումիդ» և «Բաբեկ» գազային նախագծերը:

Նրա խոսքով' դա արվել է նավթի համաշխարհային գների անկման հետևանքով նախագծերի վրա ծախսերի' ենթադրվող եկամուտներից ավելի մեծ լինելու պատճառով:

«Նավթի ցածր գները հարկադրում են նվազեցնել նախագծերի վրա ծախսերն ու ներդրումները, ինչը խոչընդոտում է հիշյալ նախագծերի իրականացմանը»,- ասել է նա:

«Ազադլըգ» թերթը հայտնել է, որ 2016 թվականի առաջին երկու ամիսներին, 2015 թվականի նույն ժամանակաշրջանի համեմատ, Ադրբեջանի ՀՆԱ-ն 3,4 մլրդ դոլարով կամ 40 տոկոսով նվազել է:

«Թուրան» լրատվական գործակալությունը' հղում կատարելով Ադրբեջանի պետական մաքսային կոմիտեին, հայտնել է, որ Ադրբեջանի արտաքին առևտրաշրջանառությունը 2016 թվականի հունվար-փետրվարին կազմել է 2,2 մլրդ դոլար, ինչը 2015 թվականի նույն ժամանակաշրջանի հետ համեմատ, 45,5 տոկոսով փոքր է:

Ըստ «Ազադլըգ» ռադիոկայանի' ադրբեջանցի հայտնի տնտեսագետ Գուբադ Իբադօղլուն համոզմունք է հայտնել, որ «Ադրբեջանի տնտեսության անկումն արդեն երեք ամիս է' սկսված է»:

The Financial Times թերթի համաձայն' Ադրբեջանի արտահանման 95 տոկոսից ավելին կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին: