Սիրիական բանակն ահաբեկիչներից ազատել է Հալեպի հյուսիսարևմտյան արվարձանը

Սիրիական բանակի մարտիկները և աշխարհազորայինների ջոկատներն իրենց վերահսկողության տակ են վերադարձրել Հալեպի հյուսիս - արևմուտքում ահաբեկիչների կողմից գրավված շրջանները: Ինչպես տեղեկացնում է «Արմենպրես»-ը՝ հղում անելով Al Mayadeen հեռուստակայանին, հրոսակային կազմավորումները դուրս են քշվել Էզ Զախրա արվ արձանի ծայրամասերից, որտեղից նրանք սպառնում էին ճեղքել-անցնել կառավարական զորքերի պաշտպանության ներքո գտնվող խաղաղ թաղամասեր:

Հեռուստակայանի տեղեկություններով՝ «Ջեբհաթ ան նուսրա» խմբավորումից ահաբեկիչները և ընդդիմության զինված կազմակերպություններից նրանց դաշնակիցները, որոնք չեն պահպանում հրադադարի ռեժիմը, մեծ ուժերով գրոհել են ռազմաճակատի հինգ տեղամասերով: Օգնական ուժեր են նետվել հարևան Իդլիբի նահանգից, որը վերահսկում են հրոսակային կազմավորումները:

«Մարտերը կրել են կատաղի բնույթ և ավարտվել են միայն այսօր առավոտյան: Սիրիացի զինծառայողներին և աշխարհազորայիններին օգնություն են ցույց տվել օդուժը և հրետանին»,- հայտնել է հեռուստակայանը, հաղորդել է ՏԱՍՍ գործակալությունը: